०८ असार २०८३, सोमबार
अमेरिकाका राष्ट्रपति जो बाइडनले गुप्तचर संस्था सीआईएको प्रमुखका लागि नामांकित गरेका विलियम बर्न्सले बुधवार सिनेट कमिटीमा चीनका विषयमा बयान दिएका छन् ।
अमेरिकाको राष्ट्रिय सुरक्षाका लागि चीनसँगको प्रतिस्पर्धा तथा चीनको शत्रुवत् नेतृत्वको सामना महत्त्वपूर्ण रहेको उनको भनाइ छ ।
बर्न्स कूटनीतिको क्षेत्रमा लामो समय बिताएका अधिकारी हुन् । उनी सेन्ट्रल इन्टेलिजेन्स एजेन्सीको निर्देशक बन्ने लगभग पक्कापक्की छ ।
सिनेट इन्टेलिजेन्स कमिटीले उनलाई स्वीकृति अर्को हप्तासम्ममा दिने सम्भावना छ । यसबीचमा सिनेटरहरूले उनलाई थप प्रश्न गर्नेछन् ।
कमिटीसमक्ष बयान दिँदै उनले चार प्राथमिकतालाई रेखांकित गरे : जनता, साझेदारी, चीन र प्रविधि ।
उनले चीनलाई मजबूत, निरंकुश शत्रुको संज्ञा दिए । उसले बौद्धिक सम्पत्तिको चोरी गर्न, आफ्ना जनतालाई दमन गर्न, आफ्नो पहुँचलाई विस्तार गर्न र अमेरिकामा आफ्नो प्रभाव बढाउन क्षमता वृद्धि गरिरहेको बर्न्सले बताए ।
आफू अमेरिकाको कुनै कलेज वा विश्वविद्यालयको अध्यक्ष भएको भएको कन्फ्युसियस इन्स्टिच्युटहरू बन्द गर्नका लागि सिफारिश गर्ने बर्न्सले बताए । अमेरिकी सांसदहरू कन्फ्युसियस इन्स्टिच्युटलाई प्रचारबाजीका साधन मान्छन् ।
