०२ असार २०८३, मंगलबार
अस्ट्रेलियामा ४१ हजार फीटको उचाइमा विवाह सम्पन्न भएको छ ।
भर्जिन एयरलाइन्सको विमान मेलबर्नबाट सिड्नी गइरहेको बेलामा इलेयन टियाङ र ल्युक सेरडारले एकअर्कालाई औंठी लगाइदिए र फूलको बूके दिए । अभिनेत्री टोटी गोल्डस्मिथले पादरीको भूमिका निर्वाह गरिन् ।
फ्लाइटमा विमान परिचारिकाहरूले बिहेको घोषणा गरे अनि १५० यात्री विवाहको साक्षी बने ।
भर्जिन एयरलाइन्सका मालिक रिचर्ड ब्रानसनले सामाजिक सञ्जालमा यसको तस्वीर सार्वजनिक गरेका छन् ।
इलेयन आफैं वेडिङ प्लानर हुन् । उनले सयौं जोडीका लागि विवाह गराइसकेकी छन् र आफ्नै बिहे उनी अनौठो तरिकाले गर्न चाहन्थिन् ।
ल्युकलाई डुल्न र विमानमा यात्रा गर्न खुबै मन लाग्छ । यस्तो अवस्थामा साथीहरूले विमानमा बिहे गर्ने आइडिया दिँदा दुवैले रुचाए ।
विमानमा बिहे गरे पनि कोभिड नियम पालन गर्दै उनीहरूले एकअर्कालाई चुम्बन गर्ने अनुमति थिएन । फ्लाइटमा उनीहरू मास्क लगाएर बसिरहे ।
सिड्नी पुगेपछि उनीहरूले मास्क खोले अनि उनीहरूको फोटोशूट भयो । 
