३० जेठ २०८३, शनिबार
मेलम्चीको पानी काठमाडौं आएसँगै काठमाडौं उपत्यकाबासीको घरघरमा दैनिकरूपमा पानी आउने भएको छ ।
काठमाडौं उपत्यका खानेपानी लिमिटेडले चैतको दोस्रो हप्ताबाट दैनिकरूपमा नै पानी वितरण गर्ने योजना बनाएको हो ।
अहिले सुरुङको परीक्षण भइरहेकामा अझै २–३ महिनासम्म संरचनाको परीक्षण हुनेछ । सुरुङको परीक्षणसँगै सुन्दरीजलस्थित पानी प्रशोधन केन्द्रको परीक्षण हुने लिमिटेडका प्रमुख कार्यकारी निर्देशक मिलन शाक्यले बताए ।
केन्द्रको परीक्षण सकिएपछि नयाँ र पुरानो दुवै पोखरीमा पानी पठाइने छ । नयाँ पोखरीमा गएको पानीले पाइपको परीक्षण गरिनेछ भने पुरानो पोखरीको पानी तत्काल प्रणालीमा जानेछ । उनले भने, ‘पुरानो पोखरीको पानी पुरानो पाइपमार्फत वितरण हुनेछ ।’
अहिले सुरुङ परीक्षणको क्रममा छ । त्यो सकिएपछि प्रशोधन केन्द्र र त्यसपछि थोक वितरण प्रणाली पाइपलाइनको परीक्षण हुने खानेपानी मन्त्रालयले जनाएको छ । काठमाडौं उपत्यकामा मेलम्चीको पानी वितरणका लागि बनेका ९ पोखरी र पहिलेबाट सञ्चालनमा रहेका छ पोखरीमा पानी सँगसँगै जानेछ । नयाँ पोखरीमा भरिएको पानीले चैतमा नै नयाँ पाइपलाइन परीक्षण शुरू हुन्छ । उनले भने, ‘परीक्षण सबै गरिसक्न २–३ महिना लाग्छ ।’
काठमाडौं उपत्यकामा २ हप्तापछि पानी आउँदा एकैपटक क्षमता अनुसारको पानी नआउने मेलम्ची खानेपानी विकास समितिले जनाएको छ । अहिले सबै संरचना परीक्षणका क्रममा रहेकाले तत्कालका लागि थोरै परिमाणमा आउनेछ । त्यसलाई क्रमशः बढाउने योजना बनाइएको छ ।
काठमाडौंमा पानी आयो भन्नासाथ पूरै पानी एकैपटक नआउने प्रमुख कार्यकारी अधिकृत शाक्यले बताए । मेलम्चीबाट पहिलो चरणमा आउने भनिएको दैनिक १७ करोड लिटर प्रणालीमा जान अझै केही समय लाग्ने उनले बताए । आयोजनाले सुरुङ र प्रशोधन केन्द्रको परीक्षण सकेर त्यताबाट पानी पोखरीमा पठाएपछि वितरण तत्काल शुरू गरिने उनले बताए ।
‘जति पानी पोखरीमा आउँछ त्यति नै धारामा पानी पठाइने छ,’ उनले भने, ‘दैनिक पानी पठाइने छ, पानी थपिँदै जाँदा घरघरमा जाने पानीको परिमाण पनि बढ्ने छ ।’
पोखरीमा कति मात्रामा पानी उपलब्ध हुन्छ त्यहीअनुसार दैनिक १/२ घण्टासम्म पानी वितरण गरिने लिमिटेडले जनाएको छ । परीक्षणका क्रममा समस्या नआएको पाइएमा हेरेर पानीको परिमाण बढाउँदै जाने गरी योजना बनाइएको छ ।
लिमिटेड अन्तर्गतका सबै शाखा कार्यालयको आ–आफ्नो फेसबूक पेजबाट कहिले कहिले पानी वितरण गर्ने भनी जानकारी दिने उनले बताए । सोही माध्यममा नै पानी नआउँदा सम्पर्क गर्ने व्यक्तिको समेत टेलिफोन नम्बर राखिने छ ।
समस्या आउनासाथ सो स्थलमा पुग्नका लागि तयारी अवस्थामा एउटा समूह राखिएको उनले जानकारी दिए । कुनै पनि ठाउँमा चुहावट हुँदा तत्काल मर्मतका लागि निर्माण व्ययवसायी र आवश्यक सामग्री तयारी अवस्थामा राखिएको छ । उनले भने, ‘हामीले सकेसम्म समस्या नआउने गरी वितरण गर्ने तयारी गरेका छौं, आइहालेमा तुरुन्त समाधान हुनेछ ।’
मेलम्चीको पानी काठमाडौं आइसकेको र त्यसको वितरणका लागि संरचनाको निर्माण भइसकेको खानेपानी मन्त्रालयका प्रवक्ता रमेश न्यौपानेले जानकारी दिए । अबको केही हप्ताभित्रै उपत्यकाबासीले नियमितरूपमा पानी पाउने उनको भनाइ छ ।
मेलम्चीको पानी वितरणकै लागि उपत्यकाका विभिन्न स्थानमा गरी ९ केन्द्रबाट पानी प्रवाह गर्ने व्यवस्था मिलाइएको छ । अहिले परीक्षणको काम भइरहेको उनले बताए । उनले भने, ‘धारामा धमिलो जाँदैन प्रशोधन गरेर सफा पानी जान्छ ।’ – सञ्चिता घिमिरे/रासस
