जनशक्ति व्यवस्थापनका केही कठिनाइ र प्राविधिक समस्या नआए अबको एक महिनापछि नेपालकै ठूलो र पुरानो वीर अस्पताल धाउने शल्यक्रियाका बिरामीले धेरै सुविधा पाउनेछन् ।
शल्यक्रिया सेवाका लागि मात्रै भनेर वीरमा नौतले अत्याधुनिक सर्जिकल भवन तयार भइसकेको छ ।

पित्तथैलीजस्तो सामान्य शल्यक्रियाका लागि महिनौं कुनुपर्ने, आईसीयू शय्या नपाएर निजी अस्पताल धाउनुपर्ने अनि पालो कुर्नुपर्ने झन्झट बेहोर्नुपर्दा बिरामीहरु निजी क्लिनिकमा दोब्बर, तेब्बर शुल्क तिरेर सिटी स्क्यान र एमआरआई गर्न बाध्य छन् । उपकरण खरिदका लागि टेन्डर प्रक्रिया र जनशक्ति व्यवस्थापनका कारण भौतिक पूर्वाधार तयार भए पनि अस्पताल सञ्चालन हुन नसकेको अस्पतालका निर्देशक डा केदार प्रसाद सेन्चुरीले बताए ।

सरकारले साढे दुई अर्ब रकम खर्चेर निर्माण गरेको यो भवनबाट दिइने सेवा विदेशको सुविधासम्पन्न अस्पतालको भन्दा कम देखिँदैन । मन्त्रालयबाट आवश्यक बजेट आउनेबित्तिकै सेवा सञ्चालन गर्नेगरी तयारी भइरहेको कान्तिपुर दैनिकमा खबर छ ।