नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले देशमा एकपछि अर्को गर्दै अस्वाभाविक घटना भइरहेको बताएका छन् । उनले मुलुकमा अर्को अनिष्ट हुनसक्ने खतरा रहेको दाबी गरे । 

रुपन्देहीको बुटवलमा शुक्रवार राष्ट्रिय दलित पत्रकार संघको प्रथम अधिवेशनको उद्घाटन गर्दै प्रचण्डले नेकपा एकतालाई उल्ट्याइदिने सर्वोच्च अदालतको आदेश हुनै नसक्ने कुरा भएको टिप्पणी गरे ।

‘प्रतिनिधि सभा विघटन बदर भएपछि पनि अब रिल्याक्स गरे हुन्छ भन्ने स्थिति छैन । अनौठो–अनौठो परिस्थिति देखा परेको छ । जन्मिसकेको बच्चालाई फेरि आमाको गर्भमा लगिदिने जस्तो बढो अनौठो र अस्वाभाविक परिघटना हिजोआज देख्नुपरेको छ । त्यस्तो हुन्छ ? हुनै नसक्ने कुरा पनि हुन थालेको छ भनेपछि केही अनिष्ट हुँदैछ कि देशमा भन्ने कुराको संकेत होइन र यो ? जन्मेको बच्चालाई फेरि भित्र लगिदिने भनेको के हो यो ? हेर्दै जाऊँ अझै केही अस्वाभाविक घटना देख्नुपर्ने हो,’ प्रचण्डले भने ।  

प्रचण्डले आफूमाथि प्रतिक्रियावादीबाट घेराबन्दी भइरहेको आरोप लगाए । ‘सबभन्दा बढी घेराबन्दी ममाथि भएको धेरै गहिरो गरी बुझिरहेको छु, देशभित्रका प्रतिक्रियावादी, गणतन्त्र र समावेशी समानुपातिक नपराउनेहरू सबै मिलेर यसलाई उल्ट्याइछाड्ने कसरतमा छन्,’ उनले भने । 

प्रतिनिधिसभा पुनःस्थापना भए पनि ‘रिल्याक्स’ गरेर बस्ने अवस्था नरहेको उनले दाबी गरे ।