राष्ट्रपति विद्यादेवी भण्डारीले चन्द्रागिरि नगरपालिका–१ दहचोकस्थित काजी कालु पाँडेको समाधिस्थमा पुगेर  पुष्पगुच्छा अर्पण गरेकी छन् ।

अनौपचारिक रूपमा पुगेकी राष्ट्रपति भण्डारीले दहचोकमा रहेको कालु पाँडेको पूर्णकदको शालिकमा माल्यार्पण गरेको ईन्द्रदह एकीकृत पर्यटन विकास समितिका अध्यक्ष हरिशरण थापाले बताए ।

राष्ट्रपति भण्डारीले दहचोकमा चन्द्रागिरि नगरपालिका–१ दहचोक १०० गन्तव्य भित्रको ऐतिहासिक, धार्मिक, सांस्कृतिक, रणनैतिक, सामरिक, पुरातात्विक एवं रमणीय पर्यटकीय स्थल ईन्द्रदह/काजी कालु पाँडे समाधिस्थल क्षेत्रको अवलोकन भ्रमणका साथै ईन्द्र ईन्द्रायणी, मनकामना गणेश र बासुकीनागको दर्शन गरेर फर्किएकी छन् ।

राष्ट्रपति भण्डारीले दहचोकमा निर्माण गरिएको दहचोक ‘भ्यू टावर’बाट काठमाडौं उपत्यकासहित आसपासको दृश्यावलोकन समेत गरिन् । सो क्रममा शिक्षा, विज्ञान तथा प्रविधिमन्त्री कृष्णगोपाल श्रेष्ठले दहचोकको ऐतिहासिक तथा धार्मिक पक्षबारे राष्ट्रपतिलाई जानकारी गराएका थिए ।

ऐतिहासिक तथा धार्मिक पर्यटकीयस्थल दहचोकलाई सरकारले १०० पर्यटकीय गन्तव्यको सूचीमा राखेको छ । दहचोकमा इन्द्रदह पनि रहेको छ । सो ठाउँमा हरेक वर्ष फागनु ९ गते इन्द्रदह पर्यटन महोत्सवमा प्रधानमन्त्री केपी शर्मा ओली सरिक हुँदै आएका छन् ।

दहचोकमा आन्तरिक पर्यटकको घुइँचो लाग्दै आएको छ । विशेषतः सार्वजनिक बिदाका दिन उपत्यका र आसपासका वासिन्दा मनोरञ्जनका लागि दहचोक पुग्ने गरेका छन् ।

दहचोकबाट काठमाडौं उपत्यकाका साथै धादिङ, नुवाकोट र गोरखालगायत क्षेत्र देख्न सकिने जनाइएको छ ।