प्रधानमन्त्री एवं नेकपा एमाले संसदीय दलका नेता केपी शर्मा ओलीले बोलाएको संसदीय दलको बैठकअघि वरिष्ठ नेता झलनाथ खनाल–माधव नेपाल पक्षले आफूपक्षीय सांसदहरूको भेला बोलाएको छ । 

राष्ट्रिय कार्यकर्ता भेला चलिरहेको स्थान हेरिटेज गार्डेन सानेपामा बिहान साढे १० बजे सांसदहरूको भेला बोलाइएको एक सांसदले लोकान्तरलाई जानकारी दिए । 

खनाल–नेपाल पक्षले बिहीवारका लागि ओलीले बोलाएको संसदीय दलको बैठकमा उपस्थित नहुने बताएको थियो । 

कार्यकर्ता भेला आयोजना गरिएको थाहा हुँदाहुँदै ओलीले संसदीय दलको बैठक बोलाएकाले सहभागी नहुने स्थायी कमिटी सदस्य एवं सांसद योगेश भट्टराईले जानकारी दिए ।

खनाल–नेपाल पक्षको कार्यकर्ता भेला बुधवारदेखि जारी छ । 

ओलीले बिहान ११ बजेका लागि संसदीय दलको बैठक बोलाएका छन् ।

बैठकमा सहभागी हुनका लागि सूर्य चुनाव चिह्नबाट लडेका सबैलाई अनिवार्य उपस्थितिको ह्वीप जारी गरिएको एमाले मुख्य सचेतक विशाल भट्टराईले लोकान्तरलाई जानकारी दिए ।