पश्चिम बंगालमा भारतीय जनता पार्टी सत्तारूढ दल तृणमूल कांग्रेसका लागि सबभन्दा ठूलो चुनौतीका रूपमा उदाएको छ । 

भाजपाले चुनाव जित्न अनेकौं उपाय रचिरहेको छ तर टिकट वितरणको सवालमा उसलाई समस्या परिरहेको छ । 

बाहिरका मान्छे वा स्टारहरूलाई चुनावको टिकट दिइँदा भाजपाका कार्यकर्ताहरू रिसाएका छन् । उनीहरूले बंगालका कतिपय शहरमा प्रदर्शन गरेका छन् । 

बंगालको अलीपुरद्वार विधानसभा सीटमा भाजापाले अर्थशास्त्री अशोक लाहिरीलाई टिकट दियो । भाजपा कार्यकर्ता यसबाट आक्रोशित भए र उनीहरूले स्थानीय कार्यालय बाहिर प्रदर्शन गरे । भाजपाका जिल्ला अध्यक्षले पनि उम्मेदवारलाई चिन्दैनौं भनिदिए । त्यसपछि भाजपाले उम्मेदवार बदल्यो र जिल्ला महासचिव सुमन कांजीलाललाई टिकट दियो ।
 

जगतादल र जलपाईगुडी सदर इलाकामा पनि त्यही भयो । भाजपाले त्यहाँ टिकट जारी गर्दा तृणमूलबाट आएका मानिसलाई टिकट दिएको थाहा भएपछि भाजपा कार्यकर्ताले तोडफोड गरे । 
 

जगतादलमा भाजपाले अरिन्दम भट्टाचार्यलाई टिकट दियो तर कार्यकर्ताहरूले विरोध शुरू गरे । जलपाईगुडीमा आक्रोशित कार्यकर्ताहरूले पार्टी कार्यालयमा तोडफोड गरे । 
 

मालदा, दुर्गापुर र पाण्डेश्वर समेत विभिन्न क्षेत्रमा पनि उम्मेदवारको नाम घोषणा भएपछि कार्यकर्ताहरू रिसाएर तोडफोड गरेका छन् ।