प्रमुख श्रम गन्तव्य मुलुकमा कोरोना त्रास, कतारमा ५ जनाभन्दा बढी भेला हुन नपाइने

प्रतिकात्मक तस्वीर

नेपालको प्रमुख श्रम गन्तव्य मलेसियालगायत खाडी मुलुकमा कोरोना भाइरसको लहर बढ्न थालेको छ ।

पछिल्ला केही समययता मलेसिया, कतार, साउदी अरब, संयुक्त अरब इमिरेट्स (यूएई), ओमन, बहराइन र दक्षिण कोरियामा फेरि कोरोना भाइरस संक्रमण बढ्न थालेको हो । 
 
संक्रमण बढेसँगै सम्बन्धित मुलुकले स्वास्थ्य मापदण्ड पालनामा कडाइ गर्न थालेका छन् । सन् २०२० मा कोरोनाबाट आक्रान्त भएका ती मुलुकमा वर्षान्तसँगै कोरोना संक्रमण कम भएको थियो । गन्तव्य मुलुकले कोरोना विरुद्धको खोप कार्यक्रम चलाइरहेका भए पनि संक्रमण फैलने दर अझै नियन्त्रणमा आएको छैन । 
 
कतारले संक्रमण पूर्णरूपमा नियन्त्रणमा नआएको भन्दै त्यहाँको ‘सुप्रिम कमिटी फर क्राइसिस म्यानेजमेन्ट’को सिफारिसमा शुक्रवारदेखि लागू हुने गरी ३३ बुँदे विशेष निर्देशन जारी गरेको छ । निर्देशन बुधवारको मन्त्रिपरिषद् बैठकले स्वीकृत गरेको थियो । 
        
कतार सरकारको निर्देशन अनुसार अब कुनै पनि स्थानमा ५ जनाभन्दा बढी भेला हुन पाइने छैन । सरकारी तथा निजी क्षेत्रमा काम गर्ने कर्मचारीले बैठक गर्दा स्वास्थ्य तथा सुरक्षाका सम्पूर्ण प्रक्रिया अवलम्बन गर्नुपर्ने, अनावश्यक रूपमा सामाजिक भेटघाट नगर्ने र घरभित्र वा बन्द स्थानमा ५ जनाभन्दा बढी भेला हुन रोक लगाइएको दोहास्थित नेपाली दूतावासले जनाएको छ । 
 
सबै सार्वजनिक पार्क, सार्वजनिक स्थानलगायत सार्वजनिक स्थल शुक्रवारदेखि नै बन्द गरिएको छ । ती स्थानमा एकै परिवारका २ जनाभन्दा बढी जान नपाउने निर्देशन कतार सरकारबाट जारी भएको दूतावासले जनाएको छ । कोरोनाको जोखिम बढेसँगै कतारले व्यापारिक भवनमा हुने क्रियाकलापलाई ३० प्रतिशतमा सीमित गरेको छ ।


Advertisement

१२ वर्षभन्दा कम उमेरका बालबालिकालाई त्यस्ता स्थलमा जान बन्देज लगाइएको छ । सवारीसाधन प्रयोग गर्दा मास्क अनिवार्य गरिएको छ । एउटा सवारीसाधनमा चालकसहित ४ जनाभन्दा बढी यात्रा गर्न नपाइने व्यवस्था रहेको पनि दूतावासद्वारा जारी विज्ञप्तिमा जनाइएको छ । 

घरबाट कुनै पनि कामका लागि बाहिर निस्कँदा चालू अवस्थामा रहेको कोरोनाको जोखिम विश्लेषण गर्ने मोबाइल एप्लिकेसन हुनैपर्ने व्यवस्था रहेको दूतावासले जनाएको छ । दूतावासले कतार सरकारले जारी गरेका निर्देशनको पूर्ण पालना गर्न त्यहाँ रहेका नेपाली समुदायमा आह्वान गरेको छ । कोभिड–१९ को संक्रमणबाट आफू र समुदायलाई सुरक्षित राख्न तथा नियमको उल्लंघनबाट भोग्नुपर्ने दण्ड जरिवानाबाट समेत जोगिन दूतावासले अपिल गरेको छ । कतारमा विभिन्न पेशा, व्यवसायमा संलग्न नेपालीको ठूलो संख्या रहेको छ । 

पछिल्ला केही दिनयता छिमेकी भारतमा पनि कोरोनाको संक्रमण तीव्र रूपमा फैलिरहेको छ । कोरोना संक्रमण रोक्न भारतका केही राज्यले कडाइ गरेसँगै त्यहाँ कार्यरत नेपाली स्वदेश फर्कने क्रम बढेको छ । केही राज्यमा लकडाउन गरिएसँगै आर्थिक क्रियाकलाप खुम्चिएको छ । कतिपय नेपालीले अस्थायी रोजगारी गुमाएका छन् । सीमा नाकाबाट भित्रने नेपालीको लर्को लाग्न थालेको छ ।

कमेन्ट गर्नुहोस्