२९ जेठ २०८३, शुक्रबार
इन्डोनेसियाको मकस्सर शहरमा रहेको एक क्याथोलिक चर्चमा आइतवार दुईजना आत्मघाती आक्रमणकारीले विस्फोट गराउँदा १४ जना मानिस घाइते भएको देशको राष्ट्रिय प्रहरीले जनाएको छ ।
ईस्टर पवित्र साताका अवसरमा चर्चमा भेला भएका व्यक्तिहरूलाई तारो बनाउँदै विस्फोट गराइएको प्रहरीको भनाइ छ ।
आत्मघाती आक्रमणकारीहरू कुन अतिवादी समूहका हुन् भनी अधिकारीहरूले छानबिन गरिरहेका छन् । केही समयअघि पक्राउ परेका लडाकूहरूसँग यिनको कुनै साइनो छ कि भनेर पनि खोजी गरिएको राष्ट्रिय प्रहरीका प्रवक्ता आर्गो युवोनोले बताए ।
गत जनवरी महिनामा प्रतिआतंकवादी इकाइले मकस्सरमा लडाकूहरू लुकेको ठाउँमा छापा मारेर दुईजनाको हत्या गरेको थियो । सन् २०१९ मा एक फिलिपिनो चर्चमा गरिएका दुई बम आक्रमणमा तिनीहरूको संलग्नताको आशंका गरिएको थियो ।
चर्चका फादर विल्हेमुस तुलकले आरोपित बम आक्रमणकारी मोटरसाइकल चढेर चर्चको प्रांगणमा आएको तर उनलाई सुरक्षा गार्डले रोकेको बताए ।
सीसीटीभी फूटेजमा विस्फोटका कारण आगो लागेको, धूवाँ उडेको र सडकको बीचसम्म टुक्राटाक्री पुगेको देखिन्छ ।
कुनै समूहले घटनाको जिम्मेवारी लिइसकेको छैन ।
