२८ जेठ २०८३, बिहीबार
अवैधरूपमा नदीजन्य पदार्थ उत्खनन गरेको अवस्थामा प्रहरीले १३ वटा सवारीसाधनलाई नियन्त्रणमा लिएको छ ।
तनहुँका विभिन्न स्थानीय तहमा अवैधरूपमा उत्खनन गर्दै गरेको अवस्थामा प्रहरीले ४ एक्साभेटर, २ जेसीबी, ४ ट्रयाक्टर र ३ टिप्पर नियन्त्रणमा लिएको हो ।
म्याग्दे गाउँपालिका–५ छाङ्पाटनमा नदी बगरबाट अवैधरूपमा गिट्टी, बालुवा उत्खनन गर्दै गरेको अवस्थामा ग१क २८७९ नम्बरको जेसीबीलाई नियन्त्रणमा लिइएको छ । सवारीलाई कारवाहीका लागि पठाइएकामा म्याग्दे गाउँपालिकाले २० हजार रुपैयाँ जरिवाना गरेको छ ।
व्यास नगरपालिका–७ गलमखोलास्थित सामुदायिक वनको निषेधित क्षेत्रमा अवैधरूपमा ढुंगा उत्खनन गर्दै गरेको अवस्थामा ना१क ६२५२ नम्बरको एक्साभेटरसहित ग१त ६०९८ नम्बरको ट्रयाक्टरलाई नियन्त्रणमा लिइएको छ । ती सवारीलाई कारवाहीका लागि पठाइएकामा व्यास नगरपालिकाले २० हजार रुपैयाँ जरिवाना गराएको छ ।
भीमाद नगरपालिका–५ एक्ले भन्ने ठाउँमा विना इजाजत गिट्टी, बालुवा उत्खनन गर्दै गरेको अवस्थामा एक्साभेटरसहित बालुवा लोड गरेको ग१त ४०६१ नम्बरको टिप्परलाई नियन्त्रणमा लिइएको छ । शुक्लागण्डकी नगरपालिका–८ मा रहेको जमिनबाट विना इजाजत ढुंगा, माटो उत्खनन गरिरहेको अवस्थामा ग१क ३४३५ नम्बरको एक्साभेटरसहित लोड गरिरहेका ग१त ३१९०, ग१त ३४२१ र ग१त ३०७० नम्बरको ट्रयाक्टरलाई नियन्त्रणमा लिइएको छ । ती सवारीलाई कारवाहीका लागि शुक्लागण्डकी पठाइएकामा ५६ हजार रुपैयाँ जरिवाना भएको छ ।
शुक्लागण्डकी नगरपालिका–९ छहरा स्थितमा रहेको जमिनबाट विना इजाजत अवैधरूपमा नदीजन्य पदार्थ उत्खनन गरिरहेको अवस्थामा ग१क ३७८८ नम्बरको एक्साभेटर र ग१क ३१७५ नम्बरको जेसिभीसहित ग१क ३२५२, ग१क ३२५१ नम्बरको टिप्परलाई नियन्त्रणमा लिई कारवाहीका लागि नगरपालिका बुझाइएको छ ।
