निधारमा लामो टीका लगाएका अनि गेरुवस्त्र लगाएर धुनी जगाएर बसेका श्री एम कुम्भमेलामा आएका अन्य योगीहरू जस्तै देखिन्छन् । 

बैरागी क्याम्पमा उनी उपनिषद् तथा भगवद्गीताको प्रवचन दिन्छन् । 

श्री एमको वास्तविक नाम मुमताज अली खान हो र केरलाको मुसलमान परिवारमा जन्मेका थिए । 
 

कुम्भमेलामा पनि आफ्नै अखडा योगधाम बनाएका छन् । त्यहाँ दिनहुँ धर्मशास्त्रको प्रवचन, साधुसेवा र भजनकीर्तन गरिन्छ । 
‘

ईश्वरका विभिन्न नाम छन्– अल्लाह, क्राइस्ट, कृष्ण तथा अन्य । नाम फरक फरक भए पनि ईश्वर एक हुन् । यो ज्ञान हामीले प्राप्त गरेपछि हामी सबै एउटै कुरा खोजिरहेका छौं भन्ने थाहा पाउँछौं,’ मन्द मुस्कान सहित उनी बताउँछन् । 

परोपकारी तथा आध्यात्मिक कामका लागि पोहोर साल पद्मभूषण प्राप्त गरेका श्री एमको संस्था सत्संग फाउन्डेसनले आन्ध्र प्रदेशको मदनपल्लेमा गरीबगुरुवाका लागि विद्यालय र क्लिनिक सञ्चालन गर्छ । 

श्री एमको कथा रमाइलो छ । तिरुवनन्तपुरममा एक समृद्ध परिवारमा जन्मेका उनी बालककालदेखि नै योगप्रति आकर्षित भएको बताउँछन् । 

उन्नाईस वर्षको उमेरमा उनी घरबाट भागेर गुरुको खोजीमा हिमालय पुगेका थिए । ऋषिकेशबाट बदरीनाथसम्म ३०० किलोमिटर उनी साधुको भेषमा पैदलै हिँडेका थिए ।

उनले बदरीनाथभन्दा पर एक गुफामा हिमालयका योगीलाई भेटेका थिए । उनलाई नाथ सम्प्रदायमा दीक्षित गरियो जसमा उत्तर प्रदेशका मुख्यमन्त्री योगी आदित्यनाथ पनि दीक्षित छन् । 

उनी आफ्ना गुरुका साथ तीन वर्षसम्म हिमालयका विभिन्न क्षेत्र घुमे । त्यसक्रममा गुरुले उनलाई प्राचीन धर्मशास्त्र सिकाएका थिए । 

उनी अहिले योगसूत्र, उपनिषद् तथा अन्य वेदान्तका ग्रन्थको ज्ञानका साथै आफ्नो अनुभव पनि बाँड्ने गर्छन् । 

कुम्भ मेलामा उनको प्रवचन सुन्न ठूलै भीड उपस्थित भएको देखिन्छ ।