रुसले साइबर आक्रमण तथा अन्य शत्रुतापूर्ण गतिविधि गरेको भन्दै अमेरिकाले प्रतिबन्धको घोषणा गरेको छ र १० जना कूटनीतिकर्मीलाई देशबाट निकालेको छ । 

रुसको हानिकारक विदेशी गतिविधिलाई रोकथाम गर्नका लागि यो प्रतिबन्ध लगाइएको ह्वाइट हाउसको कथन छ । 

पोहोर साल सोलरविन्ड्सको ह्याकिङमा रुसको गुप्तचर निकाय संलग्न रहेको ह्वाइट हाउसले जनाएको छ । 

अनि अमेरिकी राष्ट्रपतिको निर्वाचनमा पनि रुसले हस्तक्षेप गरेको आरोप छ । 

रुसले यी सबै आरोपलाई अस्वीकार गर्दै यसको कडा जवाफ फर्काउने बताएको छ । 

अमेरिकाका राष्ट्रपति जो बाइडनले बिहीवार एक आदेश जारी गरेर यी प्रतिबन्धहरूको विवरण दिएका छन् । रुसका ३२ अधिकारी र अन्य मानिसमाथि कारवाही गरिएको उल्लेख छ । 

मंगलवार मात्र बाइडनले रुसका राष्ट्रपति भ्लादिमिर पुटिनसँग बैठक गरेर अमेरिकाको राष्ट्रिय हितलाई दृढतापूर्वक रक्षा गर्ने बताएका थिए । यसका साथै उनले पुटिनसँग बैठक गर्ने प्रस्ताव पनि राखेका थिए । त्यस बैठकमा दुवै देश मिलेर काम गर्न सकिने विषयको पहिचान गरिने प्रस्ताव थियो । 

बिहीवार बाइडनले रुसविरुद्ध प्रतिबन्ध लगाउने निर्णयलाई आनुपातिक संज्ञा दिए । 

उनले भने, ‘हामीले यसभन्दा बढी कठोर कदम चाल्न सक्थ्यौं भनी मैले पुटिनलाई बताएँ । तर म रुससँग तनाव र संघर्ष बढाउने सिलसिला शुरू गर्न चाहन्नँ ।’

वार्ता तथा कूटनीतिक प्रक्रियामार्फत अबको बाटो हिँड्ने उनको भनाइ छ ।