०१ असार २०८३, सोमबार
चीनका राष्ट्रपति सी चिनफिङले चीनका विरुद्ध अमेरिकाले चलाएको अभियानलाई परास्त गर्न विश्वव्यापी सहकार्यका लागि आह्वान गरेका छन् ।
महामारीबाट उक्सनका लागि खुला विश्व अर्थतन्त्र अपरिहार्य रहेको पनि उनले बताए ।
‘पर्खाल ठड्याउने वा सम्बन्ध विच्छेद गर्ने काम अर्थशास्त्र तथा बजारका सिद्धान्तको नियमविपरीत छ,’ सीले बोओओ फोरम फर एसियामा भिडियोमार्फत कुराकानी गर्दै बताए । ‘त्यसले अरूको हितलाई हानि गर्छ र आफैंलाई पनि फाइदा गर्दैन ।’
‘केही देशले बनाएको नियम अरूमाथि थोपर्न मिल्दैन अनि केही देशले अपनाएको एकपक्षीयतावादले सारा संसारलाई अनुसरण गराउन मिल्दैन,’ सीले भने । ‘ठूला देशहरूले आफ्नो हैसियतअनुरूपको व्यवहार देखाउनुपर्छ र जिम्मेवारीका साथ काम गर्नुपर्छ ।’
सीले आफ्नो सम्बोधनमा कुनै पनि देशको नाम लिएनन् । चिनियाँ नेताहरू अरूको नाम सार्वजनिक रूपमा लिएर बेइज्जती गराउँदैनन् । तर उनको टिप्पणी अमेरिकाप्रति लक्षित थियो । हालका महिनामा अमेरिकाले चीनमाथि दबाब बढाउँदै लगेको छ ।
‘अर्कालाई धाकधक्कु देखाउँदै हिँड्ने र अर्काको आन्तरिक मामिलामा हस्तक्षेप गर्ने कामलाई कसैले पनि समर्थन गर्दैन,’ सीले उक्त फोरममा बताए ।
उक्त कार्यक्रममा हजारौं कार्यकारी तथा राजनीतिक नेताहरू उपस्थित थिए ।
