३१ जेठ २०८३, आइतबार
उद्योग संघ चितवनले जिल्लामा रहेका उद्योगहरूमा प्रयोग गरिएका अक्सिजन सिलिन्डर संघमा जम्मा गरिदिन अनुरोध गरेको छ ।
कोभिड संक्रमणसँगै सिलिन्डर अभाव हुने देखिएपछि संघले जम्मा गर्न थालेको हो ।
संघका कार्यकारी निर्देशक गणेशप्रसाद सिलवालका अनुसार बिहीवारदेखि अक्सिजन ग्यास प्रयोग गर्ने उद्योगमा टेलिफोन गरेर सिलिन्डर संघमा पठाइदिन अनुरोध गरिएको हो ।
‘धातुको काम गर्ने उद्योगमा अक्सिजन ग्यास प्रयोग हुने गर्दछ । सबैसँग हामीले सहयोगका लागि अनुरोध गरेका छौं,’ उनले भने ।
जिल्लाका ४० भन्दा बढी उद्योगमा अक्सिजन ग्यास प्रयोग हुने गरेको उनको भनाइ छ । ती उद्योगबाट ५० भन्दा बढी सिलिन्डर संकलन हुने अपेक्षा गरिएको छ ।
संघका अध्यक्ष राजु पौडेलले जिल्ला प्रशासन कार्यालय चितवन र उद्योग परिसंघको आग्रहपछि उद्योगीसँग रहेका सिलिन्डर संकलन गर्न लागिएको बताए । कतिपय सिलिन्डर उद्योगबाटै अत्यावश्यक ठाउँमा पठाउने विषयमा पनि छलफल भइरहेको छ ।
उनका अनुसार सिलिन्डर संकलन भएपछि अक्सिजन भरेर उपचारका लागि अत्यावश्यक ठाउँमा पठाइने छ ।
अक्सिजनको माग घट्दै गएपछि फिर्ता मागेर सम्बन्धित उद्योगमा पठाइने उनले जानकारी दिए । पौडेलले भने, ‘हामी यो मानवीय कार्यमा सक्दो सहयोग गर्छौं ।’
कोरोनाको पहिलो लहरमा संघले अस्थायी अस्पताल स्थापनाका लागि प्रदर्शनी हल उपलब्ध गराएको थियो ।
