१९ असार २०८३, शुक्रबार
कोरोनाभाइरसविरुद्धको खोपलाई भ्याक्सिन मैत्री नाम दिँदै भारतले छिमेकी मुलुकहरूलाई उपलब्ध गराउँदै आएकोमा अहिले देशमै खोपको अत्यधिक माग भएपछि रोकेको छ ।
यस्तो अवस्थामा चीनले आफूकहाँ बनाएको खोप नेपाल लगायत दक्षिण एसियाली मुलुकहरूलाई उपलब्ध गराउन थालेको छ ।
भारतबाट कोभिशील्ड खोप ल्याएपछि नेपाल लगायत दक्षिण एसियाली मुलुकले चीनको खोपलाई खासै वास्ता नगरेको अवस्था थियो । तर भारतले थप खोप दिन नसक्ने भएपछि चिनियाँ खोपलाई दक्षिण एसियाली मुलुकहरूले भित्र्याउन थालेका छन् ।
चीनले दक्षिण एसियाली मुलुकहरूलाई खोपका केही मात्रा उपहारका रूपमा दिइरहेको छ भने भारतसँग खोपको कच्चा पदार्थमा चर्को मूल्य असुलिरहेको छ । चिनियाँ कम्पनीहरूले भारतसँग कोरोनाभाइरसविरुद्धको लडाइँमा उपयोगी उपकरण र तिनको निर्माणका लागि आवश्यक कच्चा पदार्थको मूल्य बढाएका छन् ।
जस्तो, १० लिटर अक्सिजन कन्सनट्रेटर २० डलरमा पाइन्छ भने अहिले त्यसको एक हजारदेखि १२ सय डलर असुल्ने काम भइरहेको छ ।
भारतका कोभिडको दोस्रो लहरका कारण अक्सिजन कन्सनट्रेटर, सिलिन्डर र ट्यांकरको आवश्यकता बढेर गएको छ ।
हङकङमा भारतीय काउन्सल जनरल प्रियंका चौहानले साउथ चाइना मर्निङ पोस्टमा यो विषय उठाएकी छन् । चीनले कोभिडविरुद्धको दोस्रो लहरमा आवश्यक सामानको मूल्यमा नियन्त्रण गर्ने अपेक्षा भारतले गरेको उनले बताइन् ।
चीनको सिचुआन एयरलाइन्सले भारत जाने उडान पनि बन्द गरिदिएको छ । त्यसैले कच्चा पदार्थ मगाउन पनि समस्या परेको छ ।
