राष्ट्रपति विद्यादेवी भण्डारीले संविधानको धारा ७६(२) अनुसार सरकार गठन गर्न दिएको समयावधि सकिनैलाग्दा राजनीतिक भेटवार्ता तीब्र भएका छन् ।

यसक्रममा नेपाली कांग्रेसका सभापति शेरबहादुर देउवालाई भेट्न माओवादी केन्द्रका अध्यक्ष पुष्पकमल दाहाल ‘प्रचण्ड’ बूढानीलकण्ठ पुगेका छन् । 

कांग्रेस पदाधिकारी बैठकअघि प्रचण्ड देउवालाई भेट्न पुगेका हुन् । कांग्रेसले ४ बजेको लागि पदाधिकारी बैठक बोलाएको छ ।

बिहान जसपा अध्यक्ष महन्थ ठाकुर र राजेन्द्र महतोसँगको भेटपछि कांग्रेसले पदाधिकारी बैठक बोलाएको हो । 

राष्ट्रपति विद्यादेवी भण्डारीले सरकार गठन गर्न दिएको समयावधि बिहीवार राति ९ बजे सकिँदैछ । बहुमतीय सरकार गठनका लागि पहल भए पनि हालसम्म नयाँ सरकार गठनमा सहमति जुट्न सकेको छैन ।