पूर्व राजा ज्ञानेन्द्र शाहले आफूहरुको उपचारमा खटिने स्वास्थ्यकर्मीलाई आभार व्यक्त गरेका छन् ।

थापाथलीस्थित नर्भिक इन्टरनेशनल हस्पिटलमा १९ दिन लामो उपचारपछि कोरोना संक्रमणमुक्त भई राजा ज्ञानेन्द्र बैशाख २९ गते राति ८ बजे डिस्चार्ज भएका थिए ।

त्यसको दुई दिनपछि अर्थात बैशाख ३१ गते पूर्व महारानी कोमल शाह र पूर्व राजकुमारी प्रेरणा शाह डिस्चार्ज भएका थिए ।

पूर्व राजा शाहले एक ट्वीट गर्दै कोरोनाको वैश्विक महामारीका कारण आफूहरु नर्भिक अस्पतालमा रहँदा हरदम सेवामा जुट्ने डाक्टर, नर्स तथा हमेसा मनोवल उच्च राख्न हौसला दिने अन्य सहयोगी व्यक्ति र देशविदेशमा रहेका शुभचिन्तकप्रति आभार प्रकट गरेका छन् ।

यसैगरी, पूर्व राजपरिवारका सदस्यहरु स्वस्थ भई डिस्चार्ज भइसकेपछि नर्भिक अस्पतालका अध्यक्ष बसन्त चौधरीले पनि एक ट्वीट गर्दै खुशी व्यक्त गरेका छन् ।  उनले पूर्व राजा तथा राजपरिवारका सदस्यहरुको सुस्वास्थ्य र दीर्घजीवनको समेत कामना गरेका छन् ।

पूर्व राजा शाह, पूर्व रानी कोमल शाह र राजकुमारी प्रेरणा शाह कोरोना संक्रमण भई नर्भिकमा भर्ना भएका थिए ।

पूर्व राजा र राजकुमारीको सामान्य अवस्थामै उपचारलाई जारी राखिएको थियो भने पूर्वरानीको अवस्था भने निकै जटिल बनेको थियो ।

उनलाई हाइफ्लो अक्सिजनको सपोर्टसहित केही दिन आइसीयूमा राख्नु परेको थियो । कोरोना संक्रमणका लागि प्लाज्मा थेरापी विधिबाट समेत उपचार गरिएको थियो । ​

आइसीयूमा राखेको केही दिनमै पूर्वरानीको अवस्था सुधार भएपछि वार्डमा सारिएको थियो । वार्डमा सारिएको केही दिनमै उनलाई शुक्रबार डिस्चार्ज गरिएको थियो । 

मौसूफ सरकारहरू स्वस्थ भै निवास फिर्ता होई बक्सेकोमा समस्त नर्भिक परिवार हर्षित छौं । साथै, सरकारहरूको सुस्वास्थ्य एवम् दीर्घ जीवनको कामना गर्दछौं ।@meghaahana @manish_khemka @bastolasom #norvic #CovidWarriors #FightAgainstCOVID19 https://t.co/hXY6HoTFGE

— Basant Chaudhary (@basant_cg) May 14, 2021