२१ जेठ २०८३, बिहीबार
बागमती प्रदेशसभा सदस्य गीता वाग्लेले आफ्ना छोरीछोराले आमा खुवाउने औसीमा अस्ट्रेलियाबाट पठाएको रकमले अस्पताललाई अक्सिजन सिलिन्डर दिएकी छन् ।
वाग्लेले ईच्छाकामना गाउँपालिकाको मुग्लिनमा रहेको मुग्लिन हाईवे हस्पिटललाई ५ सिलिन्डर र एउटा ट्रली उपलब्ध गराएकी हुन् ।
वाग्लेले हस्पिटलका अध्यक्ष रामबहादुर लामासँगै मणिरत्न शाक्य, मुक्ति श्रेष्ठ र विनोद श्रेष्ठलाई ती सामग्री सोमवार हस्तान्तरण गरिन् । उनका अनुसार अस्ट्रेलियाको सिड्नीमा रहेकी छोरी रञ्जु वाग्ले थापाले औसीमा पठाएको १ हजार अस्ट्रेलियन डलर र छोरा सुगन्ध वाग्लेले पठाएको १० हजार रुपैयाँले ती सामग्री खरिद गरेर सहयोग गरेको बताइन् ।
सामाजिक क्षेत्रमा क्रियाशील वाग्लेले यसअघि पनि विभिन्न संघ संस्थालाई सहयोग गर्दै आएकी छन् । उनले भनिन्, ‘पहाडी क्षेत्रमा कोरोना संक्रमितहरूलाई केही हदसम्म राहत होस् भनेर सहयोग गरेकी हुँ ।’
संस्थाका अध्यक्ष लामाले अस्पतालले हाल १० शय्याको निःशुल्क आइसोलेसन सञ्चालन गरेको बताए । समुदायस्तरबाट सञ्चालन भएको सो अस्पताललाई विभिन्न संघ संस्थाले सहयोग गर्दै आएका छन् । लामाका अनुसार २ जना चिकित्सक सहितको अक्सिजन सिलिन्डर राखेर आईसोलेसन चलाइएको छ ।
