जिल्ला प्रशासन कार्यालय रुकुम पूर्वले यस वर्ष यार्सा संकलनमा रोक लगाउन निर्देशन दिएको छ ।

कोरोना संक्रमण फैलिरहेकाले यस बेलामा यार्सा संकलन खुला गर्दा संक्रमणको जोखिम झन् उच्च हुने भएपछि रोक लगाउन जिल्ला प्रशासन कार्यालयले निर्देशन दिएको हो । 

रुकुम पूर्वसहित यार्सा पाइने छिमेकी जिल्लाका प्रमुख जिल्ला अधिकारीसहित जूम मिटिङबाट यस वर्ष पनि यार्सा संकलनमा रोक लगाउने सहमति भएको यस जिल्लाका प्रमुख जिल्ला अधिकारी राजकुमार राईले जानकारी दिए ।

कोरोना महामारी फैलिरहेको यो अवस्थामा एउटा जिल्लाले मात्र रोक लगाएर नहुँने भन्दै यार्सा पाइने छिमेकी जिल्लामा पनि रोक लगाउने सहमति भएको उनले बताए ।

कोरोना महामारीकै कारण गत वर्ष पनि यार्सा संकलनमा रोक लगाइएको थियो । कोरोनाबाट बच्न भन्दै यार्सा संकलनमा रोक लगाइरहँदा यसबाट जीविकोपार्जन गर्दै आएकाको भने रोजिरोेटी खोसिएको छ । 

रुकुम पूर्वको पुथाउत्तरगंगा गाउँपालिका–१ र २ नम्बर वडाका बुकी पाटनमा यार्सा पाइने गर्दछ । प्रत्येक वर्षको जेठको दोस्रो हप्ताबाट शुरू भएर असारको दोस्रो हप्तासम्म चल्ने गरेको यार्सा सिजन गत वर्ष र यस वर्ष भने ठप्पै छ । 

डिभिजन वन कार्यालय रुकुम पूर्वले भने रोक लगाउनुभन्दा अगाडि नै केही परिमाण यार्सा संकलनको पूर्जी दिइसकेको छ । २ हप्ताअघि नै ७ किलोको संकलन पूर्जी दिएको वन कार्यालयका सहायक वन अधिकृत सूर्य मैनालीले जानकारी दिए ।

त्योभन्दा पछाडि कसैलाई पनि यार्सा संकलन पूर्जी नदिएको मैनालीले बताए । गत वर्ष र यस वर्ष यार्सा संकलनमा रोक लगाउँदा विशेषगरी पुथाउत्तरगंगा गाउँपालिकाका स्थानीय समस्यामा परेका छन् ।