०२ असार २०८३, मंगलबार
भारत र चीनबीच गत वर्ष भएको झडपमा मारिएका चिनियाँ सैनिकबारे ब्लग लेखेका ब्लगरलाई ८ महिना जेल सजाय भएको छ ।
ब्लगर ३८ वर्षीय चियो जिमिङलाई नायक र शहीदको अपमान गरेको आरोपमा दोषी ठहर गर्दै सजाय गरिएको छ ।
चीनको सरकारी अखबार ग्लोबल टाईम्सका अनुसार चीनमा आपराधिक कानून संशोधनपछि ब्लग लेख्दा सजाय पाउने जिमिङ पहिलो व्यक्ति हुन् । कानून अनुसार दोषी ठहर पाइए ३ वर्षसम्म जेल सजाय हुनसक्ने प्रावधान छ ।
जिमिङलाई सार्वजनिक माफी माग्न समेत निर्देशन दिइएको थियो । उनले सरकारी टेलिभिजनमा अन्तर्वार्ता दिँदै आफू लज्जित भएको बताएका छन् । उनले भनेका छन्, ‘मेरो व्यवहार मर्यादाको विरुद्धमा थियो ।’
भारत–चीनबीच गत वर्ष जुनमा गलवानमा झडप भएको थियो । झडपमा २० भारतीय सैनिकको मृत्यु भएको थियो चीनले यकिन विवरण सार्वजनिक गरेको थिएन ।
चिनियाँ सैनिक मारिएको विषयमा जिमिङले सामाजिक सञ्जाल विबोमा ब्लग लेखेका छन् । जिमिङको सञ्जालमा २५ लाख फलोअर्स रहेका छन् । ब्लग लेखेपछि जिमिङलाई पक्राउ गरिएको थियो ।
