२२ जेठ २०८३, शुक्रबार
चीनका एक सैन्य वैज्ञानिकले कोेभिडलाई विश्वव्यापी महामारी घोषणा गरिनुअघि नै त्यसविरुद्धको खोपको पेटेन्ट अधिकार दर्ता गराएको खुलासा भएको छ ।
युसेन चोउ चिनियाँ जनमुक्ति सेनामा कार्यरत थिए र उनले चिनियाँ कम्युनिस्ट पार्टीका तर्फबाट पेटेन्टका लागि सन् २०२० फेब्रुअरी २४ मा कागजात बुझाएको द अस्ट्रेलियन नामक पत्रिकाले खबर दिएको छ ।
चीनले कोरोनाभाइरस मानिसबाट मानिसमा सर्छ भनी पुष्टि गरेको पाँच हप्ता मात्र भएको बेलामा पेटेन्ट दर्ता गराइएको हो ।
चोउले वुहान इन्स्टिच्युट अफ भाइरोलोजीका वैज्ञानिकहरूसँग नजिकै बसेर काम गरेको पनि बताइएको छ । चमेराहरूमा कोरोनाभाइरसको अनुसन्धान गर्ने प्रयोगशालाकी उपनिर्देशक शी चङ्लीसँग पनि उनको साँठगाँठ थियो ।
भाइरस प्रयोगशालाबाट चुहिएको भन्ने अनुमानले बल पाइरहेको बेलामा उनीहरूको सम्बन्धबाट चीनसँग मानिसहरूमा संक्रमण हुने विषयमा जानकारी रहेको र पछि बल्ल उनीहरूले अन्तर्राष्ट्रिय समुदायलाई बताएको पाइएको छ ।
चोउ पेटेन्ट दर्ता गरेको तीन महिनाभन्दा कम समयमा बितेका थिए । उनी चीनको अग्रणी वैज्ञानिक भए पनि उनको मृत्युको खबर एउटा चिनियाँ सञ्चारमाध्यमले मात्र दिएको द न्युयोर्क पोस्टले खबर दिएको छ ।
चोउले मिनेसोटा विश्वविद्यालय तथा न्युयोर्क ब्लड सेन्टर लगायत अमेरिकी संस्थासँग मिलेर अनुसन्धान गरेका थिए ।
