१० साउन २०८३, आइतबार
बिरामीको चाप उच्च भएपछि भरतपुर अस्पतालले जिल्लाका सातै पालिकामा विशेषज्ञ सेवा विस्तार गर्ने योजना अघि बढाएको छ । पालिकाका नगर अस्पताल वा आधारभूत अस्पतालमध्ये एउटामा भरतपुर अस्पतालका विशेषज्ञ चिकित्सकबाट बहिरङ्ग सेवा (ओपिडी) सञ्चालन गर्ने तयारी गरिएको हो ।
यसका लागि अस्पतालले पालिकाका प्रमुखसँग छलफल सुरु गरिसकेको छ । अस्पतालका प्रमुख मेडिकल सुपरिटेन्डेन्ट डा. विश्वबन्धु बगालेले भरतपुर महानगरपालिकाका कार्यवाहक प्रमुख चित्रसेन अधिकारीसहितको टोलीसँग शारदानगर हेल्थपोस्टको स्थलगत अध्ययन गरेको जानकारी दिए । उनका अनुसार उक्त हेल्थपोस्टमा भरतपुर अस्पतालका विशेषज्ञ चिकित्सक पठाउने तयारी भइरहेको छ।
“भरतपुर महानगर सकारात्मक भएकाले छिट्टै हामी यो काम अघि बढाउँछौँ,” उनले भने ।
रत्ननगर नगरपालिकाका प्रमुख र उपप्रमुखसँग पनि छलफल भइरहेको तथा अन्य पालिकासँग आवश्यक समन्वय अघि बढाइएको डा. बगालेले बताए । पालिकास्तरमै विशेषज्ञ सेवा पुगेपछि भरतपुर अस्पतालमा हुने बिरामीको घुइँचो कम हुने उनको विश्वास छ।
“स्थानीयस्तरमै नागरिकलाई भरतपुर अस्पतालको सेवा दिँदैछौँ,” उनले भने । ती अस्पतालमा प्राथमिक र विशेषज्ञ सेवा उपलब्ध गराइने तथा भरतपुर अस्पतालले अति विशिष्टिकृत उपचारमा केन्द्रित हुने उनले बताए ।
डा. बगालेका अनुसार सामान्य समस्या लिएर भरतपुर अस्पताल आउनुपर्ने बाध्यताको अन्त्य गर्न यो अभियान सञ्चालन गर्न लागिएको हो । सबै पालिका सकारात्मक भए दुई वर्षभित्र अस्पतालमा आउने बिरामीको सङ्ख्या आधा घटाएर विशिष्टिकृत सेवामा थप ध्यान दिन सकिने उनले बताए ।
हाल भरतपुर अस्पतालमा दैनिक ओपिडी सेवाका लागि तीन हजारसम्म बिरामी आउने गरेका छन् । सामान्य समस्याका बिरामीसमेत अस्पताल आउँदा व्यवस्थापनमा जटिलता थपिएको र बिरामीले पनि सास्ती खेप्नुपरेको उनले बताए ।
उनका अनुसार विस्तारित सेवा प्रभावकारी भए देशभर नै यो अभियान विस्तार गर्न सकिनेछ । अहिले अस्पतालमा आउने ७० प्रतिशतभन्दा बढी बिरामी स्वास्थ्य बीमामा आबद्ध रहेकाले यसबाट बीमित बिरामीलाई पनि थप सहज हुने विश्वास गरिएको छ।
