प्रधानमन्त्री केपी शर्मा ओलीले नवनियुक्तसहित सबै मन्त्रीहरुलाई जनताको पक्षमा इमान्दारीताका साथ काम गर्न निर्देशन दिएका छन् । सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको मन्त्रिपरिषद् बैठकमा ओलीले सो निर्देशन दिएका हुन् ।

‘सरकारले मध्यावधि निर्वाचन गरेको छ । सरकारको अहिलेको एकमात्र लक्ष्य सफलतापूर्वक चुनाव सम्पन्न गराउनु हो । यो कुरालाई आत्मसाथ गर्दै तपाईँहरु जनताको पक्षमा काम गर्न लागिपर्नुस्’, बैठकमा मन्त्रीहरुलाई निर्देशन दिँदै ओलीले भने ।

उनले सुखी नेपाली समृद्ध नेपालको नारालाई आत्मसात गर्दै अघि बढ्न पनि निर्देशन दिए । सो क्रममा आफूले नेतृत्व सम्हालेपछि जनताको पक्षमा काम गर्न लागिपरेको र त्यसका लागि सबै मन्त्रीहरुले पनि इमान्दार भएर प्रयास गर्नुपर्नेमा उनको जोड थियो ।

एक मन्त्रीका अनुसार आजको बैठक परिचयात्मक र निर्देशनात्मकमै सीमित थियो ।

प्रधानमन्त्रीले बिहीबार मन्त्रिपरिषद् विस्तार गर्दै २५ सदस्यीय बनाएका छन् भने आज थपिने मन्त्रीमा ७ मन्त्री र एक राज्यमन्त्री रहेका छन् ।

यसैबीच यस्तै बैठकले सरकारको प्रवक्ताको जिम्मेवारी सञ्चार तथा सूचना प्रविधिमन्त्री नैनकला थापालाई दिएको छ ।