नेकपा एमाले कर्णाली प्रदेशसभा संसदीय दलका प्रमुख सचेतक गुलावजंग शाहले सरकारमा सहभागी मन्त्रीलाई हट्न निर्देशन दिने बताएका छन् ।

‘फ्लोर क्रस’ गरेर महेन्द्रबहादुर शाही नेतृत्वको सरकार जोगाएका एमालेका ४ सदस्यलाई तत्काल राजीनामा दिएर सरकार छाड्न निर्देशन दिइने शाहले बताए ।

दलको बैठक बसेर तत्काल सरकारबाट बाहिरिन निर्देशन दिइने उनले जानकारी दिए ।

अदालतको फैसलाअनुसार चारै जना एमालेको प्रदेशसभा सदस्य भएकाले अब दलको ह्वीप मान्नुपर्ने शाहको भनाइ छ । एउटा दलको चुनाव चिह्नबाट चुनाव जितेर आएपछि म त्यो दलको होइन म नीतिनियम मान्दैन भन्न नपाउने भएकाले पार्टी र संसदीय दलको विधानअनुसार चल्नुपर्ने उनको तर्क छ ।

दल बदलको कानूनअनुसार कारवाही गरिएको उल्लेख गर्दै उनले भने, ‘कि सरकार छाडेर दल मातहत आउनु पर्‍यो नत्र कारवाहीको भागिदार हुनुपर्‍यो ।’