प्रधानमन्त्री केपी शर्मा ओलीले सरकारका कामको कुप्रचार गर्नेविरुद्ध प्रतिवादमा उत्रिन मन्त्रीहरूलाई निर्देशन दिएका छन् ।

प्रधानमन्त्री ओलीले बुधवार राष्ट्रिय विपद् जोखिम न्यूनीकरण तथा व्यवस्थापन राष्ट्रिय परिषद्को छैठौं बैठकलाई सम्बोधन गर्दै सरकारका विरुद्धमा विरोधीहरूले कुप्रचार गरेको आरोप लगाएका हुन् ।

त्यसको प्रतिवादमा उत्रिनका लागि मन्त्रीहरूलाई निर्देशन छ । विरोधीहरू आक्रमक ढंगले प्रस्तुत भएको भन्दै उनले सरकारको कामको प्रचार प्रसार गर्न र विरोधीको खण्डन गर्न आग्रह गरे ।

उनले भने– ‘हरेक मन्त्रीहरूलाई सरकारको कामको प्रचार गर्न र विरोधीको खण्डन गर्न र आफ्ना काम र उपलब्धिहरूको डिफेन्ड गर्न अनुरोध छ ।’

प्रधानमन्त्री ओलीले विपक्षीहरूले आलोचनामा यत्रो समय कटाए पनि सरकार ढाल्न नसकेर अदालतको सहारा लिन पुगेको टिप्पणी पनि गरे ।

उनले यस वर्ष अघिल्ला वर्षहरूमा जस्तो तराइ डुबानमा नपर्ने पनि बताए ।

नेपाल-भारत सीमा क्षेत्रमा लगाएको बाँध पहिले खुला नछोडिने गरेका कारण डुबान भएको भन्दै उनले यसवर्ष बाँधलाई खोलिएको बताए । अन्य विभिन्न ठाउँमा पनि बाँध खोलिँदै जाने उनको भनाइ थियो ।

बाँधका कारण नेपाली भुमि डुबानमा पर्ने विषयमा सर्वे गर्न संयुक्त टोली आवश्यक रहेको र त्यसनिम्ति काम गर्न पनि प्रधानमन्त्री ओलीले निर्देशन दिए ।

उनले भने– ‘जुन डुबान क्षेत्रहरू हो त्यहाँ हामीले अलिकति खोलेका छौँ । अरु ठाउँहरूमा पनि खोल्दै जानु आवश्यक छ । यसका निम्ति संयुक्त टोलीले सर्भे गर्ने, संयुक्त टोलीले निर्णय गर्ने र संयुक्त टोलीलाई खटाउनुपर्ने यहीँ बेला हो । सीमावर्ती क्षेत्रका बाँध, जसबाट नेपालको भुमि डुबानमा परेको छ त्यो कुरा संयुक्त टोलीले हेर्ने विषयतर्फ कार्य गर्न सक्छौँ ।’

प्रधानमन्त्री ओलीले सरकारले चुरे दोहन गर्न नखोजेको स्पष्ट पार्नुभयो । सरकार चुरेको संरक्षणका लागि ठोस योजनाका साथ लागेको उनले बताए ।

उनले भने– ‘हामीले चुरे दोहन नहोस् भन्नका लागि बजेटमा चुरे दोहन नगर्ने, चुरेको दोहनलाई रोक्ने, त्यहाँबाट ढुंगा, बालुवा, गिट्टी आदि निकाल्ने काम रोक्ने, खानी पत्ता लगाउने, त्यो खानी उपयुक्त छ कि छैन वातावरणीय सर्भे गर्ने अनि मात्रै खानीबाट गिट्टीबालुवा निकाल्ने ।'

प्रधानमन्त्री ओलीले थपे- 'बढी भयो भने त हामीले बिक्री पनि गर्न सक्छौँ भन्ने कुरा हो । त्यो कुनै अनौठो कुरा होइन । हामीले चुरेको संरक्षण गर्न खोजेको । हामी चुरे विनाश होइन, चुरेको संरक्षण गर्न लागि पर्याछौँ । चुरेको संरक्षण गरिन्छ । ठोस योजनाका साथ हामी लाग्या छौँ ।’

उनले अहिले नयाँ बाटो बनाउने काम जोखिमयुक्त भएकाले भदौसम्म नयाँ बाटो खन्ने तथा पहाडहरू भत्काउने काम रोक्नुपर्ने पनि बताए ।