काभ्रेपलाञ्चोकमा आफ्नै पत्नी र छोरालाई विषादी सेवन गराई हत्या गरेका आरोपमा १ जना पक्राउ परेका छन् । 

पक्राउ पर्नेमा पाँचखाल नगरपालिका–६ का ३३ वर्षीय माधव घिमिरे रहेको प्रहरीले जनाएको छ ।

बनेपा नगरपालिका–११ बानियाँटोलमा डेरा गरी बस्दै आएका घिमिरेलाई प्रहरीले गएराति पक्राउ गरेको छ । उनी बनेपाकै तीनदोबाटोमा फेन्सी पसल व्यवसाय गर्दै आएका थिए ।

प्रहरीले उनकी पत्नी ३० वर्षीया मनिषा कार्की घिमिरे र ६ वर्षीय छोरा युवानलाई बिहीवार राति १२ बजे उनी बस्ने डेरामा मृत अवस्थामा फेला पारेको इलाका प्रहरी कार्यालय बनेपाका प्रहरी निरीक्षक राजन कोइरालाले जानकारी दिए ।

उनका अनुसार बिहीवार साँझ बनेपा नपा–८ करुणामार्गस्थित भित्री गल्लीबाटोमा भाग्दै गरेको अवस्थामा उनलाई पक्राउ गरिएको हो । घिमिरेले पत्नी र छोरालाई नाम नखुलेको विषादी सेवन गराएर डेरा गरी बस्ने कोठाको बाहिरबाट ताल्चा लगाएर हिँडेको अवस्थामा स्थानीयले सोधखोज गर्दा ‘हिजो हाम्रो झगडा परेको थियो, पसलतिरै होली’ भन्दै भागेकाले प्रहरीलाई खबर गरिएको थियो ।

प्रहरीले खोजतलास गर्ने क्रममा भाग्दै गरेको अवस्थामा घिमिरेलाई पक्राउ गरेको थियो । मृतकको कोठामा विभिन्न प्रकारको विषादी र औषधि फेला परेको जनाएको छ । 

घिमिरेले आफूले पनि विभिन्न प्रकारका औषधि सेवन गरेको भनेपछि उपचारका लागि उनलाई प्रहरीले आफ्नै नियन्त्रणमा बनेपास्थित शिरमेमोरियल अस्पतालमा भर्ना गराएको छ । घिमिरेको स्वास्थ्य अवस्था हाल सामान्य रहेको प्रहरीले जनाएको छ ।

घिमिरेले पत्नी र छोरालाई विषादी सेवन गराएको र आफूले पनि सिटामोल लगायत विभिन्न थरीका सयभन्दा बढी चक्की औषधि सेवन गरेको प्रहरीसमक्ष बताएको छ । मृतक दुवैको शव पोस्टमार्टमका लागि धुलिखेल अस्पतालमा पठाइएको छ ।

घटनाबारे थप अनुसन्धान भइरहेको प्रहरीले जनाएको छ ।