अमेरिकी वायुसेनाले इरानसमर्थक गुटहरूमाथि बमवर्षा गरेपछि सिरियामा सक्रिय मिलिसियाले अमेरिकी सैनिकहरूमाथि रकेट बर्साएका छन् । 

त्यसपछि अमेरिकी सेनाले जवाफी कारवाहीमा सिरियाली गुटमाथि व्यापक गोली बर्साएको छ ।

इराकको राजधानी बग्दादमा अमेरिकी सैन्य मिसनका प्रवक्ता कर्नेल वेन मारोट्टोले सोमवार बिहान ७ः४४ मा सिरियामा अमेरिकी बलहरूमाथि रकेट आक्रमण भएको बताए । आक्रमणमा कोही पनि हताहत नभएको र क्षतिको

आकलन भइरहेको जानकारी पनि उनले दिए । अमेरिकी बलहरूले आत्मरक्षामा तोप प्रहार गरेको जानकारी पनि उनले दिए । 

त्यसको एक दिनअघि आइतवार अमेरिकाले इराक र सिरियाको सीमानजिक इरानसमर्थित मिलिसियाको अड्डालाई तारो बनाएर हवाई आक्रमण गरेको थियो । इराकी सेनाले अमेरिकी आक्रमणको निन्दा गरेको थियो र मिलिसिया समूहहरूले अमेरिकासँग बदला लिने बताएका थिए । 
 

पेन्टागनका प्रेस सचिव जोन कर्बीले यी मिलिसियाहरू इराकमा अमेरिकी बलहरूका विरुद्ध मानवरहित यानबाट आक्रमण गर्न ती अड्डाहरूको उपयोग गरिरहेको बताए ।