१४ असार २०८३, आइतबार
बलिउडका चर्चित अभिनेता आमिर खानले पत्नी किरण रावसँग बिहेको १५ वर्षमा सम्बन्धविच्छेद गरेका छन् । तर उनको यो सम्बन्धविच्छेद पहिलो भने होइन ।
खानले यसअघि नै पहिले पत्नी रीना दत्तासँग सम्बन्धविच्छेद गरिसकेका थिए ।
भारतीय सञ्चारमाध्यमका अनुसार किरणसँग आमिरको पहिलो भेट सन् २००१ मा चलचित्र लगानको छायांकनका क्रममा भएको थियो । पत्नी रीनासँग सम्बन्धविच्छेद भएपछि आमिरले किरणलाई फेरि भेटेर सम्बन्ध अगाडि बढाएका थिए ।
आमिरले किरणसँग फोनमा कुराकानीका क्रममा मन पराएका थिए । एक अन्तर्वार्तामा आमिरले भनेका छन्, ‘किरणसँग मैले १ घण्टासम्म फोनमा कुराकानी गरे । जब मैले फोन राखे, त्यसपछि मलाई उनीसँग कुरा गर्नु धेरै राम्रो लाग्यो ।’
आमिरले पहिलो पत्नी रीतासँग सम्बन्धविच्छेद पछि पनि राम्रै सम्बन्ध छ । पानी फाउन्डेसनमा आमिर, रीना र किरणले मिलेर काम गरिरहेका छन् ।
रीनाबाट आमिरका २ सन्तान छन्, आयरा खान र जुनैद खान । दुवै आमा रीनासँग बस्ने गर्छन् । आमिर भन्ने गर्छन्, ‘रीना धेरै सानदार मान्छे छिन्, कहिले–कहिले कुनै नाता अगाडि बढ्न पाउँदैन तर मेरो मनमा उनका लागि धेरै माया र इज्जत छ ।’
रीनासँग सम्बन्धविच्छेद गरेर किरणसँग बिहे गरेका आमिरले फेरि सम्बन्धविच्छेद गरेका छन् । दुवैले संयुक्त वक्तव्य जारी गर्दै बिहेको १५ वर्षमा सम्बन्धविच्छेद गरेको जनाएका छन् ।
अब दुवैले नयाँ जिन्दगीलाई अलग–अलग जिउने भएका भारतीय सञ्चारमाध्यमले जनाएका छन् ।
संयुक्त वक्तव्यमा लेखिएको छ, ‘यी १५ सुन्दर वर्षमा हामीले एकसाथ जीवनभरका अनुभव, आनन्द र खुशी आदानप्रदान गरेका छौं । हाम्रो सम्बन्ध केवल विश्वास, सम्मान र प्रेममा बाँडिएको थियो । अब हामी जीवनको नयाँ अध्याय शुरू गर्न चाहन्छौं – पतिपत्नीको रूपमा नभई सह–बुवा–आमा र परिवारका रूपमा । हामीले केही समयअघि अलग–अलग हुने योजना शुरू गरेका थियौं । अब यस योजनालाई औपचारिक रूप दिन सहज महसूस गरिरहेका छौं ।’
सम्बन्धविच्छेद भएपनि आगामी दिनमा समेत सहकार्य हुनसक्ने संयुक्त वक्तव्यमा उल्लेख छ । ‘हामी दुवै अलग–अलग बस्ने भएपनि आफ्नो जीवनलाई एक विस्तारित परिवारका रूपमा सहकार्य गर्नेछौं । हामी छोरा आजादप्रति समर्पित आमा–बुवा हौं । उनको पालनपोषण हामी मिलेर गर्नेछौं । हामी फिल्म, पानी फाउन्डेसन र अन्य परियोजनामा पनि सहयोगीको रूपमा काम जारी राख्नेछौं ।’
