१७ असार २०८३, बुधबार
कृष्ण सागर (ब्ल्याक सी) मा तनाव बढिरहेको अवस्थामा रुसका लडाकू विमानहरूले नक्कली शत्रुको युद्धपोत बनाएर त्यसमा सटीक बमवर्षाको अभ्यास गरेका छन् ।
रुसी जलसेनाको कृष्ण सागर फ्लीटका लडाकू विमानहरूले दक्षिणी सैन्य कमान्डसँग मिलेर संयुक्त जलसैन्य अभ्यास गरेका हुन् । त्यसक्रममा शत्रुका युद्धपोतमाथि बम खसाउने र क्षेप्यास्त्र प्रहार गर्ने अभ्यास गरिएको थियो ।
आजकल अमेरिकी नेतृत्वको सैन्य संगठन नेटोले पनि अन्य देशका सेनासँग मिलेर कृष्ण सागरमा युद्धाभ्यास गरिरहेको छ ।
रुसको अभ्यासमा सुखोई–३० एसएम, सुखोई एसयू–२४, सुखोई एसयू–३४ लगायतका युद्धविमानहरू सहभागी थिए ।
रुसी वायुसेनाले दुई दिनअघि मात्र क्राइमियामा एस–४०० क्षेप्यास्त्र प्रणालीको परीक्षण गरेको थियो । रुसका सैन्य अधिकारीहरूले यस मिसाइल डिफेन्स सिस्टमको अपरेसनल तयारीको परीक्षण गरिरहेका छन् ।
एस–४०० एन्टी–एयरक्राफ्ट मिसाइल सिस्टम र पेन्टसिर सेल्फ प्रोपेल्ड मिसाइल तथा गन सिस्टमलाई फायर गरेर तिनको तयारीको परीक्षण गरिएको हो ।
नेटोले कृष्ण सागरमा सैन्य अभ्यास गर्दा रुस चिढिएको छ ।
