फलाम बोकेको ट्रकले चितवनमा दुईवटा स्कुटरलाई ठक्कर दिँदा एक महिलाको मृत्यु भएको छ । 

नारायणगढदेखि लमजुङतर्फ गइरहेको ट्रकले आज दिउँसो ३ बजे भरतपुर–१, आँपटारीनजिक विपरीत दिशाबाट आइरहेको दुईवटा स्कुटरलाई ठक्कर दिएको हो । 

ठक्करबाट प्रदेश ३–००३ प ३५४३ नम्बरको स्कुटरमा सवार तनहुँ देवघाट–१ की ४२ वर्षीया चिनिमाया पौडेलको मृत्यु भएको जिल्ला प्रहरी कार्यालय चितवनले जनाएको छ । स्कुटर चालक ३५ वर्षीय पुष्पराज बास्तोलाको पुरानो मेडिकल कलेजमा उपचार भइरहेको छ। अवस्था गम्भीर रहेको प्रहरीको भनाइ छ । 

यस्तै अर्का स्कुटर चालक तनहुँ देवघाट गाउँपालिका–५ का ३० वर्षीय तिलबहादुर गुरुङ र पछाडि सवार सोही ठाउँकी ३५ वर्षीया सिरु गुरुङको चितवन मेडिकल कलेजमा उपचार भइरहेको जिल्ला प्रहरी कार्यालय चितवनका प्रवक्ता प्रहरी नायव उपरीक्षक सूर्यबहादुर थापाले जानकारी दिए ।

ग१ख ९७५६ नम्बरको ट्रकले प्रदेश ३–००३ प ३५४३ र प्रदेश २–०३–००७ प ७१९६ नम्बरको स्कुटरलाई ठक्कर दिएको थियो ।