२६ असार २०८३, शुक्रबार
प्रतिनिधि सभा विघटनको विरोध भन्दै नपाली कांग्रेसका एक जना सांसदले ‘कालो क्याप’ लगाएर राष्ट्रिय सभाको बैठकमा सहभागिता जनाएका छन् ।
सडक आन्दोलन गर्ने अवस्था नरहेको भन्दै उनले कालो झण्डाको रूपमा आफूले जीवनमै पहिलोपटक क्याप लगाएको बताए ।
सोमवार बसेको राष्ट्रिय सभाको बैठकको विशेष समयमा नेपाली कांग्रेसका सांसद रमेशजंग रायमाझीले प्रतिनिधि सभा विघटनको विरोधमा आफू फरक पोशाकमा आएको बताए ।
सम्बोधन गरेपछि उनले कालो क्याप खोलेका थिए । उनले शर्ट र कोट पनि कालो लगाएका थिए ।
संसदभित्र सांसदहरूले क्याप लगाउनुलाई मर्यादित मानिँदैन ।
रायमाझीले प्रधानमन्त्री केपी ओलीले निरंकुश ढंगले प्रतिनिधि सभा विघटन गरेको आरोप लगाए ।
‘सामान्त गोयल आउँदा के डिनर खानुभयो ? संघीय संसद्भित्र एक जनाले बाहेक कसैले विरोध नगरेको चुच्चे नक्सा कहाँ गयो ?’ उनले प्रश्न गरे ।
यसअघि रायमाझीले पहिलो प्रतिनिधि सभा विघटनको समयमा अध्यक्षमार्फत प्रधानमन्त्रीलाई संविधानको प्रति बुझाएका थिए ।
