देशका विभिन्न ठाउँमा डुबेर एकैदिन सात जनाको मृत्यु भएको छ। मृत्यु हुनेमा चार बालबालिका पनि छन् । 

बारा, कलैया उपमहानगरपालिका-१०, मटिअर्वास्थित इँटा भट्टाको पानी जमेको खाल्डोमा डुबेर ७ वर्षीया बालिकाको मृत्यु भएको छ । सोही ठाउँ बस्ने ७ वर्षीया मनिषाकुमारी रामको आइतबार दिउँसो मृत्यु भएको हो । 

उक्त खाल्डोमा नुहाउने क्रममा डुबेर गम्भीर घाइते भएकी उनको एनएमसी अस्पताल वीरगंजतर्फ लैजाने क्रममा बाटोमै मृत्यु भएको प्रहरीले जनाएको छ । 

सुनसरी, कोशी गाउँपालिका-५, कुम्याईका ९ वर्षीय ईरफान मियाँको डुबेर आइतबार दिउँसो मृत्यु भएको छ । ईरफान र सोही ठाउँ बस्ने ७ वर्षीय मुर्सलिन मियाँ वडा कार्यालय नजिक बाटो छेउको खाल्डोमा जमेको पानीमा खेल्ने क्रममा डुबेका थिए । ईरफानको जिल्ला अस्पताल इनरुवामा उपचारको क्रममा मृत्यु भएको हो । मुर्सलिन सोही अस्पतालमा उपचारपछि घर फर्किएको प्रहरीले जनाएको छ । 

मकवानपुर, राक्सिराङ्ग गाउँपालिका-९, मरुवा डाँडाका ५७ वर्षीय वीरबहादुर प्रजाको सोही ठाउँस्थित गोराङ्दी खोलामा डुबेर आइतबार दिउँसो मृत्यु भएको छ । डनटारबाट आफ्नो घरमा फर्कने क्रममा गोराङ्दी खोलाले बगाई बेपत्ता भएका उनको खोजी गर्ने क्रममा सोही खोलाको बगरमा शव फेला परेका हो । 

सर्लाही, कौडेना नगरपालिका-५, छपकैया टोलकी ५ वर्षीया गुड्डीकुमारी रायको डुबेर आइतबार साँझ मृत्यु भएको छ । आफ्नै घरको छेउमा रहेको राम मन्दिरको पोखरीमा खेल्ने क्रममा डुबेर उनको मृत्यु भएको प्रहरीले जानकारी दिएको छ । 

यसैगरी सर्लाही, ईश्वरपुर नगरपालिका-१३ बाँके खोलामा डुबेर सोही ठाउँ बस्ने ४५ वर्षीय रामचन्द्र महतोको आइतबार राति मृत्यु भएको छ । रामचन्द्र र उनकी श्रीमती ४० वर्षीया रहन्तीदेवी महतो कान्ति बजारबाट चटपटे बेचेर सँगै घर फर्किने क्रममा उक्त खोला तर्ने क्रममा रामचन्द्रलाई खोलाले बगाएको थियो । रहन्तीदेवी भने बीचमा अड्किएकाले इलाका प्रहरी कार्यालय केशरगंज र प्रहरी चौकी गौरीशंकरबाट खटिएको प्रहरीले स्थानीयको सहयोगमा उनको सकुशल उद्धार गरेको थियो । साथै रामचन्द्रको खोजी गर्ने क्रममा घटनास्थलबाट  करिब ५०० मिटर टाढा उनको शव फेला पारेको हो । 

रुपन्देही, मायाँदेवी गाउँपालिका-२, अमुवागाउँका १२ वर्षीय कृष्ण कहारको डुबेर आइतबार दिउँसो मृत्यु भएको छ । आफ्नै घरदेखि करिब ७०० मिटर टाढा कोहोलिहवा नालामा डुबेर उनको मृत्यु भएको हो । 

दाङ, घोराही उपमहानगरपालिका-१९ घोरधैरा बस्ने ५० वर्षीया हुमा खड्काको आइतबार दिउँसो डुबेर मृत्यु भएको छ । सोही ठाउँस्थित अरुण खोलाले बगाएको भन्ने खबर प्राप्त हुनासाथ जिल्ला प्रहरी कार्यालय दाङ र प्रहरी चौकी दुईखोलीबाट खटिएको प्रहरीले खोजी गर्ने क्रममा घटनास्थलबाट करिब ३०० मिटर टाढा उनको शव फेला परेको हो ।