आगामी सोमवारभित्र कोभ्याक्स फ्यासिलिटीमार्फत ‘जोन्सन एन्ड जोन्सन’को १५ लाख मात्रा खोप नेपाल आउने भएको छ ।

स्वास्थ्य तथा जनसंख्या मन्त्रालय स्रोतका अनुसार आगामी सोमवारसम्म अमेरिकाबाट सो खोप आउने निश्चित भएको हो ।

स्वास्थ्य मन्त्रालयका एक अधिकारीले भने, ‘सोमवारसम्म जोन्सन एन्ड जोन्सनको १५ लाख मात्रा खोप आउन लागेको छ, त्यसका लागि सम्पूर्ण तयारी पूरा भइसकेको छ ।’

अन्तर्राष्ट्रिय समाचार एजेन्सी रोयटर्सका अनुसार नेपालका लागि १५ लाख र भुटानका लागि ५ लाख मात्रा खोप पठाउन लागिएको हो । राष्ट्रपति विद्यादेवी भण्डारीले केही समयअघि मात्रै परराष्ट्र मन्त्रालयमार्फत अमेरिकी राष्ट्रपतिलाई पत्र लेख्दै खोपमा सहयोग गर्न आग्रह गरेकी थिइन् ।

कोरोनाविरुद्ध बनेका अन्य खोपहरू २ मात्रा लगाउनुपर्ने भए पनि जोन्सन एन्ड जोन्सनको खोप एक मात्रा मात्र लगाए पुग्ने खोप विज्ञहरूको भनाइ छ । नेपालमा हालसम्म कोभ्याक्स फ्यासिलिटीमार्फत अक्सफोर्ड एस्ट्राजेनेकाले विकास गरेको भारतको सेरम इन्स्टिच्युटले उत्पादन गर्दै आएको कोभिसिल्ड खोप ३ लाख ४८ हजार डोज प्राप्त भएको छ ।

कोभ्याक्सले कूल जनसंख्याको २० प्रतिशतलाई पुग्ने खोप उपलब्ध गराउने प्रतिबद्धता गरेको छ । तर प्रतिबद्धताअनुरूप समानुपातिक तवरबाट खोप वितरण नभएको भन्दै आलोचना हुँदै आएको छ ।

नेपालमा प्राप्त हुने जोन्सन एन्ड जोनसनको १५ लाख मात्रा कुन समूहलाई दिने निक्र्योल नभए पनि खोप कार्ययोजनामा तय गरिएको खोप प्राथमिकता समूहका आधारमा उपलब्ध गराउने स्वास्थ्य मन्त्रालयको तयारी छ । स्वास्थ्य मन्त्रालयले अमेरिकी सरकारलाई यसअघि ५० लाख मात्रा जोन्सन एन्ड जोन्सन खोप खरिदका लागि पत्राचार गरेको थियो । तर सो पत्रको जवाफ अहिलेसम्म आएको छैन ।

अमेरिकी राष्ट्रपति जो बाइडेनले विपन्न र गरीब मुलुकलाई ८ करोड डोज खोप उपलब्ध गराउने घोषणा गरेका थिए ।

यसैबीच, कोरोना भाइरस विरुद्धको भेरोसिल खोपको पहिलो खेप शुक्रवार ८ लाख मात्रा नेपाल भित्रिएको छ । यससँगै नेपालले हालसम्म ५० लाख ४८ हजार मात्रा प्राप्त गरिसकेको स्वास्थ्य मन्त्रालयले जनाएको छ ।

मन्त्रालयका अनुसार साउन १ र ८ गते बाँकी भेरोसिल खोप आउनेछ । नेपालले चीनसँग खरिद गरेको ४० लाख मात्रा खोपमध्ये पहिलो चरणको खोप शुक्रवार नेपाल आइपुगेको हो ।

स्वास्थ्य मन्त्रालयका प्रवक्ता डा. कृष्ण पौडेलका अनुसार हालसम्म २६ लाख ११ हजार ८०७ जनाले खोपको पहिलो मात्रा लगाएका छन् । दोस्रो मात्रा लगाउनेको संख्या ९ लाख ६४ हजार ५०० रहेको छ ।

शुक्रवार देशभर २ हजार २३९ जनामा कोरोना संक्रमण पुष्टि भएको छ । स्वास्थ्य मन्त्रालयका अनुसार देशभरका प्रयोगशालामा ११ हजार ३१३ जनाको पीसीआर र एन्टिजेन परीक्षण गरिएको थियो ।

६ हजार ६५७ जना पीसीसार परीक्षण गर्दा १ हजार २३९ र ४ हजार ६५६ जनाको एन्टिजेन परीक्षण गर्दा ७६० जनामा संक्रमण देखिएको हो । देशभर शुक्रबार १ हजार ३१६ जना संक्रमित निको भई डिस्चार्ज भएका छन् ।

हालसम्म ६ लाख ६१ हजार ९२९ जना निको भएका छन् । पछिल्लो २४ घण्टामा २० जना संक्रमितको मृत्यु भएको छ । संक्रमितको संख्या घटे पनि कोरोना जोखिम कायम नै रहेको जनस्वास्थ्य विज्ञहरू बताउँछन् । राजधानी दैनिकमा खबर छ ।