३० जेठ २०८३, शनिबार
दाङको घोराही उपमहानगरपालिकाले घर घरबाट फोहोर खरिद गर्न थालेको छ ।
बोटल र गुटखाका खोलमा पैसा आउन थालेपछि स्थानीय दंग परेका छन् ।
गल्ने फोहोरबाट ग्यास र मल उत्पादनको तयारी अन्तिम चरणमा पुर्याइएको छ भने नगल्ने फोहोरलाई खरिद गरेर पुनः प्रयोगमा ल्याउन थालिएको छ ।
केही महिना पहिले सरसफाइ स्वयंसेवक परिचालन गरेर फोहोर किन्ने बारेमा जानकारी गराएको उपमहानगरपालिकाले गत शुक्रवारदेखि नागरिकको घरमै पुगेर फोहोर खरिद गर्न थालेको हो । घोराही–१४ नयाँ बसपार्कमा जलजला होटलकी सञ्चालक सीता रोकालाई फोहोर व्यवस्थापनले निकै पीडा दिँदै आएको थियो ।
हरेक दिन बिहान फोहर जम्मा गरेर उपमहानगरको गाडीमा पठाउनपर्ने झन्झट हुने गथ्र्यो । पहिलो पटक फोहर बेचेकी रोकाले बीस केजी फोहरको २०५ रुपैयाँ प्राप्त गरिन् । होटलबाट उत्पादन भएको फोहोरले आम्दानी हुने भएपछि उनी खुशी छिन् ।
यो वर्षदेखि उपमहानगरभित्रको फोहोर खरिद गर्ने नीति लिएपछि फोहोर बिक्री गर्ने प्रतिस्पर्धा नै चलेको छ । चालू आर्थिक वर्षको बजेटमै राखेर उपमहानगरपलिकाले गत वैशाखदेखि फोहोर खरिद गर्न शुरू गरेको थियो ।
हालसम्म झण्डै २० हजार रुपैयाँको फोहोर खरिद गरिएको उपमहानगरपालिका वातावरण तथा सरसफाइ महाशाखा प्रमुख लक्ष्मण अधिकारीले जानकारी दिए । उपमहानगरपालिकालाई प्लाष्टिकमुक्त बनाउने अभियानअन्तर्गत यो कार्यक्रम अघि सारिएको हो ।
उपमहानगरपालिकाले प्लास्टिकको बोतलसहित नरम पोलिथिन १ किलोलाई १०, कपडा प्रतिकिलो ५, सुर्तीजन्य प्लास्टिकको फोहोर प्रतिकिलो २, गत्ता, कापीसहित वर्गीकरण अनुसारका फोहोरलाई १० देखि २० रुपैयाँसम्ममा किलोमा खरिद गर्ने दर कायम गरिएको छ ।
यसरी खरिद गरिएको गल्ने फोहोरलाई बायो ग्यासमा प्रयोग गरिने र नगल्ने फोहोरलाई उद्योगसँग समन्वय गरेर बिक्री गरिने नगर प्रमुख चौधरीले जानकारी दिए ।
