१३ असार २०८३, शनिबार
काठमाडौं, २५ जेठ — इरानका रिभोलुसनरी गार्ड्सले तेहरानमा बुधबार संसद् भवन तथा धर्मगुरु खोमेनीको चिहानमा भएको आक्रमणको योजना साउदी अरबले बुनेको आरोप लगाएका छन् । साउदीले भने आरोपलाई अस्वीकार गरेको छ ।
बाह्रजनाको मृत्यु भएको उक्त आक्रमणको जिम्मा इस्लामिक स्टेटले लिएको छ ।
‘अमेरिकाका राष्ट्रपति र आतंकवादलाई समर्थन गर्ने साउदीका कबिला नेताहरूका बीचको बैठकको एक हप्तापछि यो आतंकवादी आक्रमण भएको छ । इस्लामिक स्टेटले आक्रमणको जिम्मेवारी लिएबाट उनीहरू यो आक्रमणमा संलग्न रहेको प्रमाणित गर्छ,’ एक वक्तव्यमा भनिएको छ ।
साउदी अरबका विदेशमन्त्री अदेल अल–जुबेरले आक्रमणमा रियादको संलग्नता नरहेको बताएका छन् ।
‘हामी जहाँको पनि आतंकवादी आक्रमणलाई भर्त्सना गर्छौं र निर्दोषको ज्यान लिने कामलाई निन्दा गर्छौं,’ उनले भने ।
साउदीलाई आक्रमणका लागि दोषी देखाउने कुनै प्रमाण छैनन् र रियादलाई आक्रमणको जिम्मेवारी लिनेहरूका बारेमा कुनै ज्ञान छैन भनी विदेशमन्त्री जुबेरले बताए ।
इरानी सेनाका ब्रिगेडियर जनरल होसेन सलामीले आक्रमणको इरानले बदला लिने बताएका छन् ।
इरानका राष्ट्रपति हसन रुहानीले यस आक्रमणबाट देश झन् एकताबद्ध हुने बताएका छन् ।
रोयटर्सबाट
