२१ असार २०८३, आइतबार
जनता समाजवादी पार्टी (जसपा)का अध्यक्ष उपेन्द्र यादवले कांग्रेस सभापति शेरबहादुर देउवाको नेतृत्वमा बन्ने सरकारमा सहभागी हुने तयारी गरेका छन् ।
उपप्रधान तथा परराष्ट्र मन्त्रालयको नेतृत्व लिएर यादव सरकारमा सहभागी हुन लागेको स्रोतले बतायो ।
सरकारमा सहभागिताको विषयलाई लिएर संघीय परिषद् अध्यक्ष डा. बाबुराम भट्टराई, अध्यक्ष यादव र वरिष्ठ नेता अशोक राईबीच मंगलवार छलफल भएको स्रोतको दाबी छ ।
औपचारिक निर्णय भने १ बजे पार्टीको बैठक बसेर लिने तयारी छ ।
यसअघि प्रधानमन्त्री केपी ओली नेतृत्वको सरकारमा यादव स्वास्थ्यमन्त्री थिए ।
पछि उनलाई कानून, न्याय तथा संसदीय मामिला मन्त्रालयको जिम्मा दिइएको थियो । केही समय कानून मन्त्रीको जिम्मेवारी सम्हालेर यादव सरकारबाट बाहिरिएका थिए ।
विगतमा पनि उपेन्द्र यादव परराष्ट्र मन्त्री बनिसकेका छन् । जसपाबाट उपेन्द्रका अलावा मोहम्मद इस्तियाक राई लगायतका अन्य केही नेता पनि मन्त्री बन्ने सम्भावना छ ।
कांग्रेस, माओवादी केन्द्र र जसपाका केही मन्त्रीलाई समेटेर मंगलवार सानो आकारको मन्त्रिपरिषद् बनाउने देउवाको तयारी छ ।
विपक्षी गठबन्धनको बैठकपछि सोमवार कांग्रेस नेता बालकृष्ण खाणले मंगलवार सानो आकारको मन्त्रिमण्डल बनाउने तयारी भएको बताएका थिए ।
कांग्रेसबाट खाणको समेत मन्त्री बन्न चर्चा छ ।
यता माओवादी केन्द्रबाट जनार्दन शर्मा, पम्फा भुसाल, देवेन्द्र पौडेल, मातृका यादवमध्ये दुई जनासम्मले आजै शपथ लिने सम्भावना छ ।
सर्वोच्च अदालतको परमादेश अनुसार देउवाले मंगलवार राष्ट्रपति भवन शितल निवासमा शपथ लिने तयारी गरेका छन् ।
