३१ जेठ २०८३, आइतबार
अवैध रुपमा भारततर्फ लैजाँदै गरेको २२ लाख बराबरको हरियो केराउ जिल्ला प्रहरी कार्यालय पश्चिम नवलपरासीले मंगलवार बरामद गरेको छ ।
६ वटा पिकअप भ्यानमा राखेर लैजाँदै गरेको अवस्थामा १८० क्विन्टल केराउ बरामद गरिएको प्रहरी उपरीक्षक मनोजकुमार यादवले बताए ।
सोमवार राति ५ वटा बेलाटारी र एउटा परासी क्षेत्रबाट पिकअप भ्यान नियन्त्रणमा लिइएको हो । एउटा पिकअप भ्यानमा ३० क्विन्टलका दरले मटर लोड गरिएको थियो ।
सीमावर्ती नाका बसैयाबाट भारततर्फ लैजानका लागि ल्याइएको मटर र सवारीसाधनलाई आवश्यक कारबाहीका लागि महेशपुर भन्सार कार्यालय पठाइने प्रहरी उपरीक्षक यादवले जानकारी दिए ।
नेपालमा भन्दा भारतमा महँगोमा बिक्री हुने भएकाले नवलपरासीको नाका हुँदै भारततर्फ मटर तस्करी हुने गरेको छ ।
प्रहरीले ठूलो मात्रामा मटर बरामद गर्ने गरे पनि तस्करी कार्य भने रोकिएको छैन । अहिले भूजहवा, झोलनीपुर र बसैया नाकाबाट मटर तस्करी हुँदै आएको छ ।
यसैबीच भारतबाट नेपालतर्फ ल्याउँदै गरेको ७ लाख बराबरका खसी–बोका प्रहरीले नियन्त्रणमा लिएको छ ।
भारतबाट हिँडाएर ल्याउँदै गरेको अवस्थामा ४५ खसी–बोका सेमरी क्षेत्रबाट नियन्त्रणमा लिइएको हो । खसीबोका भन्सार कार्यालय पठाइएको प्रहरीले जनाएको छ ।
