०२ असार २०८३, मंगलबार
भारतको उत्तर प्रदेशमा रहेको पिलिभितमा एक व्यक्ति बाघको आक्रमणबाट जिउँदै उम्कन सफल भएका छन् ।
जंगलको बाटो हुँदै मोटरसाइकलमा गइरहेका तीनजनालाई दुईवटा बाघले आक्रमण गरेका हुन् । बाघलाई बाटोमा अचानक देखेपछि बाइक चलाउने आत्तिएर बाइक लडाएका थिए ।
उनीहरू लडेर ठीक बाघको पञ्जामा पुगे ।
विकास कुमारले मोटरसाइकल चलाइरहेका थिए । उनका दुई साथीहरू घटनास्थलमै मारिए । तर उनले हेल्मेट लगाएका हुनाले बाघले उनको टाउकोमा दाह्रा गाडेको भए पनि बाँच्न सफल भए ।
कडा हेल्मेट टोक्दा छक्क परेको बाघ पछि हटेको मौका छोपेर विकास नजिकैको एउटा रुखमा चढे र पातले छेकिएर बसे ।
बाघहरूले उनका दुईमध्ये एक साथीलाई खाइदिए अनि रुखमुनि नै कराइरहे ।
रातभरि काँपेर विकास रुखमा बसिरहे ।
साथीहरू सोनु कुमार र कान्धाई लाललाई बाघले मारे । लालको आधा शरीर घना जंगलमा भोलिपल्ट गाउँलेहरूले भेटे ।
घटना गत आइतवार भएको हो । विकासले घटना सम्झँदै भने, ‘जंगलमा बाघ छन् भनी हामीलाई चेतावनी दिइएको थियो तर घर जान हतारो भएकाले हामी त्यही बाटो गयौं । हेडलाइट धमिलो बलेकाले हामीले बाघ देखेनौं । मेरो ज्यान हेल्मेटले जोगायो भने सोनु र कान्धाई बाँच्न सकेनन् ।’
कान्धाईले पनि रुख चढ्न खोजेको तर बाघहरूले उनलाई लुछेर लगेको विकासले बताए ।
भोलिपल्ट बिहान रुखको बाटो हुँदै गाउँलेहरू गएपछि विकासले चिच्याएर बोलाए । अनि उनीहरूले विकासलाई उद्धार गरे ।
पिलिभित बाघ आरक्षका उपनिर्देशक नवीन खण्डेलवालले बाघ समात्नका लागि २६ वटा क्यामरा राखेको र कर्मचारीहरूले निगरानी गरिरहेको बताए ।
अस्पतालबाट घर फर्केका विकासले जिन्दगीभरि यी बाघहरूको छवि मस्तिष्कमा रहिरहने बताए ।
