बिजुलीको पोल गाडिएको र तार टाँगिएको लामो समय बित्दा पनि बत्ती बाल्न नपाउँदा मोरङको लेटाङ नगरपालिका वडा न. १ भोगटेनीका बासिन्दा निराश बनेका छन् ।

चुनावमा गाउँ आइपुग्ने नेताहरूले बत्ती बल्छ भनेर आश्वासन दिएपनि आजसम्म पूरा नभएको स्थानीयको गुनासो छ । सरकार परिवर्तन हुँदा र नयाँ मन्त्री आउँदा स्थानीयमा आशा पलाउँछ, केही समय बित्न नपाउँदै निराशामा बदलिन्छ ।

‘चुनावमा हामीलाई जिताउनुभयो भने बिजुली आउँछ भनेर भन्छन्, तर जितेर गएपछि फर्केर पनि हेर्दैनन्,’ स्थानीय ८० वर्षीय वृद्ध जगबहादुर लिम्बूले दुखेसो पोखे ।

घरमा झिलीमिली बत्ती बाल्ने र टिभीमा बत्ती बालिदिनेहरूको अनुहार हेर्ने उनको धोको छ ।

शुरूमा तत्कालीन ऊर्जामन्त्री वर्षमान पुन अनन्तले केही बजेट पारिदिएपछि लेटाङ नगरपालिकाबाट बजेट थप गरी पोल गाड्ने र तार टाँग्ने काम भएको थियो ।

शुरूमा गाडिएका पोल बत्ती बाल्न नपाउँदै कुहिए । त्यसपछि दोस्रोपटक गाडिएका पोलसमेत ढल्न थालेका छन् । 

बत्ती बाल्ने सपना देखेका भोगटेनीका करीब ३ सय घर परिवार लामो समयदेखि बिजुलीको पोल र तार हेरेर अन्धकारमा रात बिताउन बाध्य छन् ।

बिजुली नहुँदा कष्टकर जीवन बिताउन बाध्य भएको स्थानीय गृहिणी आइतमाया लिम्बूले बताइन् । 

महिलाहरू अझै ढिकी जाँतो गर्दैछन् ।

‘गाउँमा कुटानी पिसानीका लागि मिल छैन,’ आइतमाया भन्छिन्, ‘ढिकी जाँतोकै भरमा चलेका छौं । मिल धेरै टाढा भएकाले जान/आउन समेत समस्या हुने गरेको छ ।’

पोल गाडेर, तार टाँगेपनि ट्रान्समटिर पुग्न नसक्दा बत्ती नबलेको हो ।

‘बिजुली बत्ती नआउँदा उद्योग धन्दा खोल्ने कुरा त परै जाओस्, सिञ्चाइका लागि पम्प सेट राखेर पानी तान्न नपाउँदा खेतबारी समेत बाँझै छन्,’ स्थानीय युवा राजकुमार लिम्बूले भने ।

यता लेटाङ नगरपालिकाका प्रमुख शंकर राई भने कोरोना महामारीका कारण उक्त गाउँमा बिजुली बत्ती पुर्‍याउन ढिलाइ भएको दाबी गर्छन् ।

मोरङ जिल्लालाई सुगम जिल्लाका रूपमा लिने गरिन्छ । काठमाडौं पछि भौगोलिक सुगमताका आधारमा मोरङको नाम आउँछ । तर त्यही सुगम जिल्लाका नागरिकहरू भने अन्धकारमा रात बिताउन बाध्य छन् ।

प्रदेश राजधानी रहेको जिल्लाका बासिन्दाको यो हालतले अन्य विकट जिल्लाहरूमा कस्तो अवस्था होला भन्ने प्रश्न उब्जाउँछ ।

हुनेखानेले सोलारबाट बत्ती बालेका छन् । विपन्नहरू भने अझै टुकीको सहारामा जिउन छन् ।

लेटाङ मात्र होइन, मिक्लाजुङ, केराबारी लगायतका स्थानीय तहमा समेत कतिपय गाउँमा बिजुली पुग्न सकेको छैन ।