१५ असार २०८३, सोमबार
कोरोना भाइरसका कारण विद्यार्थीहरूको पठन–पाठनमा असर पुगेपछि मोरङ बेलबारी नगरपालिकाले पठनपाठनलाई सहज बनाउन फ्री वाइफाई जडान गरेको छ । ५० स्थानमा वाइफाई जडान गरिएको नगरपालिकाको कार्यालयले जनाएको छ ।
वैकल्पिक विधिबाट पठनपाठन गर्न लागि सहज होस् भन्ने उद्देश्यका साथ एउटा वडामा ४ स्थानमा वाइफाई जडान गरिएको नगर प्रमुख ज्ञानेन्द्र सुवेदीले बताए ।
फ्री वाइफाई जडान भएपछि इन्टरनेट पहुँचभन्दा बाहिर रहेका विद्यार्थीलाई पठनपाठनमा सहज हुने नगरपालिकाले विश्वास लिएको छ । नगरपालिकाका ५ वटा विद्यालयलाई भर्चुअल कक्षाको हब बनाएर पठनपाठन गरिने नगरपालिका शिक्षा शाखाका प्रमुख भूपेन्द्र कोइरालाले बताए ।
पाँच वटा विद्यालयमा सबै विद्यालयका शिक्षक शिक्षिका भेला भएर अनलाइनको माध्यमबाट सिकाइने कोइरालाको भनाइ छ ।
अनलाइनको पहुँच नपुगेका विद्यार्थीहरूका लागि सीयूजी सिम उपलब्ध गराइएको नगर प्रमुख सुवेदीले बताए ।
सुवेदीका अनुसार उक्त सिमकार्डमार्फत् एक जना शिक्षकले ६ जना विद्यार्थीलाई एकै पटक पढाउन मिल्ने छ ।
उक्त सिमको प्रयोगबाट सामान्य खालका मोबाइलबाट समेत पठनपाठन गर्न मिल्ने भएकाले सबै विद्यार्थी पठनपाठनबाट वञ्चित नहुने नगरपालिकाको कार्यालयले जनाएको छ ।
