नेपाली कांग्रेसले प्रविधिको प्रयोग गरेर महाधिवेशन गर्न सकिने गरी विकल्प तयार पारेको छ ।

कोरोना महामारीकै अवस्थामा महाधिवेशन गर्नुपर्ने अवस्थाका लागि यस्तो विकल्प तयार पारिएको नेपाली कांग्रेस, सूचना सञ्चार तथा प्रचार विभागका सचिव दिनेश थापा मगरले बताए ।

नेपाली कांग्रेसका प्रवक्ता विश्वप्रकाश शर्मा प्रमुख रहेको सूचना, सञ्चार तथा प्रचार विभागले ‘डिजिटल भोटिङ’ प्रविधिबाट महाधिवेशनमा भोटिङ गर्न सक्ने विकल्प ल्याएको हो ।

महाधिवेशनमा यो विकल्प प्रयोग गर्नका लागि भने केन्द्रीय समितिले निर्णय गर्नुपर्ने हुन्छ ।

नेपाली कांग्रेसले आगामी भदौ १६ देखि १९ गतेसम्म १४ औं महाधिवेशन गर्ने मिति तय गरेर तयारी थालेको छ ।

७७ जिल्ला पार्टी कार्यालयमा उपस्थित भएर प्रदेश अधिवेशन र महाधिवेशन प्रतिनिधिले मतदान गर्न सक्ने व्यवस्था गरिएको थापा मगरले जानकारी दिए ।

डिजिटल भोटिङ प्रविधिले ७ प्रदेशको निर्वाचनसम्बन्धी सबै प्रक्रिया सम्पन्न गर्न सक्ने क्षमता रहेको उनले बताए । सबै तहका अधिवेशनका लागि भने यो प्रविधिको विकास नगरिएको उनको भनाइ छ ।

प्रदेश र केन्द्रीय महाधिवेशनमा मात्रै यो प्रविधि प्रयोग हुने गरी बनाइएको छ ।

यो प्रणालीअनुसार कांग्रेसले महाधिवेशन गर्दा महाधिवेशन प्रतिनिधि काठमाडौं वा प्रदेशका केन्द्रहरूमा उपस्थित भइरहनुपर्दैन ।

यो डिजिटल प्रविधि अहिले महाधिवेशनमा प्रयोग नभए पनि नेपाली कांग्रेसको सम्पत्तिको रूपमा आन्तरिक रुपमा सुरक्षित भएर रहने उनले बताए ।

७७ वटै जिल्लाको पार्टी कार्यालयमा मतदान गर्ने केन्द्र हुने र महाधिवेशन प्रतिनिधि ती केन्द्र पुगेर मतदान गर्न सक्ने थापामगरले जानकारी दिए ।

नेपाली कांग्रेसको सूचना सञ्चार तथा प्रचार विभागले १४ औं महाधिवेशन प्रचार प्रारम्भ गर्ने निर्णय पनि गरेको छ ।

यसपटकको प्रचारलाई विगतभन्दा भिन्न र जीवन्त शैलीमा अघि बढाउने निर्णय बैठकले गरेको उनले बताए ।

‘विषयकेन्द्रित प्रचारलाई गहन बनाउन केन्द्रीय नीति, अनुसन्धान तथा प्रशिक्षण प्रतिष्ठानसँग आवश्यक समन्वय गर्ने निर्णय बैठकले गरेको छ’, थापामगरले भने ।