१७ असार २०८३, बुधबार
नेकपा एमालेले पार्टीमा सहमति र एकताका लागि भइरहेको प्रयासलाई निरन्तरता दिने निर्णय गरेको छ ।
ललितपुरको च्यासलस्थित तुल्सीलाल स्मृति प्रतिष्ठानमा बसेको केन्द्रीय कमिटीको चौथो दिनको बैठकले एकतामा सबैलाई समेट्न अन्तिम प्रयास गर्ने निर्णय गरेको हो ।
एमाले प्रवक्ता प्रदीप ज्ञवालीले पार्टीको एकताका लागि भइरहेको प्रयासलाई निरन्तरता दिने निर्णय भएको जानकारी दिए ।
प्रधानमन्त्री शेरबहादुर देउवालाई विश्वासको मत दिएका २२ जना सांसदमाथि सोधिएको स्पष्टीकरणबारे केन्द्रीय कमिटीले कुनै निर्णय गरेन । अध्यक्ष केपी शर्मा ओलीको हस्ताक्षरमा हिजो २४ घण्टे स्पष्टीकरण सोधिएको थियो ।
‘पार्टीको एकतालाई कायम राख्नका लागि भइरहेका प्रयासका बारेमा छलफल भयो र यो प्रयासलाई थप निरन्तता दिने निर्णय भयो,’ ज्ञवालीले भने, ‘अध्यक्षले पार्टी एकताको सुदृढ गर्नेगरी आउन चाहने साथीहरूलाई विगतका गल्ती बिर्सेर पनि स्वागत गर्न सकिने कुरा बताउनुभएको छ ।’
प्रवक्ता ज्ञवालीले पार्टी एकताका लागि छलफल चलिरहेको तथा विघटित कार्यदलका सदस्यहरू निरन्तर संवाद रहको हुनाले छलफललाई निरन्तरता दिने निष्कर्ष निकालिएको बताए ।
‘पार्टीको एकतालाई सुदृढ गर्नका लागि चलिरहेको प्रयासलाई निरन्तरता दिने निर्णय भएको छ । साँच्चिकै पार्टीलाई बलियो बनाउने संकल्पका साथ आउने हो भने विगतका कुरालाई बिर्सिन सकिने र क्षमा गरिने कुरा अध्यक्षले बैठकमा गर्नुभएको छ,’ ज्ञवालीले भने ।
केन्द्रीय कमिटी बैठकअघि सोही स्थानमा भएको पुष्पलाल स्मृति दिवस कार्यक्रममा ओलीले माधव नेपाल पक्षका नेताहरूलाई विगतका गल्तीका लागि माफी दिइने बताएका थिए ।
केही दिनअघि ‘अन्य नेताको हकमा आत्मालोचना गर्ने ठाउँ भएपनि माधव नेपालको हकमा नभएको’ बताएका ओलीले सबै नेतालाई माफी दिने घोषणा गर्नुलाई अर्थपूर्ण रूपमा हेरिएको छ ।
माधव नेपाल पक्षका २२ सांसदले पनि आजै ओलीको स्पष्टीकरणको ४ बुँदे जवाफ पठाएका छन् ।
