भारतमा भारी मनसुन वर्षाको कारण उत्पन्न बाढी र पहिरोबाट मृत्यु हुनेको संख्या आइतवार १२४ पुगेको भारतीय अधिकारीले पुष्टि गरेका छन् । अरू दर्जनौं हराइरहेकाको खोजीका लागि उद्धारकर्मीहरू जुटिरहेको बताइएको छ । 

भारतको पश्चिमी क्षेत्रमा बिहीवारदेखि मुसलधारे वर्षा भएको छ । भारतीय मौसम विज्ञान विभागले आउँदो केही दिनमा थप वर्षा हुने भन्दै सावधानी अपनाउन आग्रह गरेको छ । 

महराष्ट्र राज्यमा बिहीवार मुम्बईको दक्षिणमा रहेको ताल्यको पहाडी गाउँमा ठूलो पहिरोमा ४० जनाको मृत्यु भएको छ । 

पहिरोमा दर्जनभन्दा बढी घरहरू परेका थिए भने पहिरोमा परी कम्तीमा ९९ जना हराइरहेको बताइएको छ ।

चिप्लुनका केही भागहरूमा बिहीवार निरन्तर २४ घण्टाको वर्षापछि पानीको तह २० फिट (६ मिटर) सम्म पुगेको र सडक तथा घरहरू डुबाएको स्थानीय सञ्चारमाध्यमहरूले जनाएका छन् ।

वर्षापछिको डुबानका कारण विद्युत् आपूर्ति अवरुद्ध हुँदा कोभिड–१९ को उपचार गराइरहेका एक अस्पतालका आठ बिरामीहरूको मृत्यु भएको थियो । उनीहरूको उपचारमा भेन्टिलेटर प्रयोग भएको तर विद्युत् आपूर्ति काटिना साथ उनीहरूको मृत्यु भएको भारतीय सञ्चारमाध्यमले जनाएका छन् ।