२८ असार २०८३, आइतबार
सरकारका न्यूनतम साझा कार्यक्रमलाई अन्तिम रुप दिन सत्तारुढ कार्यदलको बैठक बुधवार लगातार तेस्रो दिन पनि बसिरहेको छ । प्रधानमन्त्री निवास बालुवाटारमा जारी कार्यदलको बैठकले सरकारका प्राथमिकता र कामको खाकालाई अन्तिम रुप दिने बताइएको छ ।
न्यूनतम साझा कार्यक्रम तयार भएको र त्यसलाई अन्तिम रुप दिने काम भइरहेको कार्यदलका एक सदस्यले जानकारी दिए । नेपाली कांग्रेसका महामन्त्री पूर्णबहादुर खड्का संयोजक रहेको कार्यदलमा कांग्रेस, माओवादी केन्द्र र जसपाको तर्फबाट दुई–दुई जना सदस्य छन् ।
कार्यदलले बनाएको न्यूनतम साझा कार्यक्रमको खाकामाथि सोमवार सत्तारुढ दलका शीर्ष नेताहरूले छलफल गरेका थिए ।
साझा कार्यक्रममा यसै वर्षको अन्त्य सम्ममा सबै नेपालीलाई कोरोनाविरुद्धको खोप लगाउने, कोरोना महामारीका कारण शिथिल बनेको अर्थतन्त्र उकास्ने र स्थानीय तहको चुनाव गर्ने कुरालाई महत्त्व दिएर कार्यक्रम बनाउँदै गरिएको कार्यदलका एक सदस्यले बताए ।
कार्यदलमा नेपाली कांग्रेसको तर्फबाट मीनेन्द्र रिजाल र रमेश लेखक, माओवादीको तर्फबाट वर्षमान पुन र देव गुरुङ तथा जसपाबाट राजेन्द्र श्रेष्ठ र महिन्द्रराय यादव सदस्य छन् ।
असार २९ गते प्रधानमन्त्री शेरबहादुर देउवाले शपथ लिए पनि अहिलेसम्म सरकारले पूर्णता पाउन सकेको छैन । साझा कार्यक्रम सार्वजनिक गरेपछि मन्त्रिपरिषद् विस्तार गर्ने देउवाको तयारी छ ।
