१९ असार २०८३, शुक्रबार
अफगानिस्तानमा द्रुत गतिमा विकसित घटनाक्रमका विषयमा रुसले डाकेको बैठकमा भारतलाई निमन्त्रण गरिएको छैन ।
उक्त बैठकमा पाकिस्तान, चीन र अमेरिका सहभागी हुन सक्ने बताइएको छ ।
तालिबानले अफगानिस्तानमा आक्रामकता बढाइरहँदा रुसले उक्त देशमा प्रत्यक्ष सरोकार राख्ने सबै मुलुकसँग भेटघाट गरी हिंसा रोक्न र शान्ति प्रक्रिया अघि बढाउन कोशिश गरेको छ ।
विस्तारित त्रिपक्षीय बैठक ६ दिनपछि कतारमा गरिने कार्यक्रम छ ।
रुसले अफगानिस्तानमा शान्ति ल्याउन तथा राष्ट्रिय मेलमिलापको परिस्थिति निर्माण गर्न मस्को फर्म्याट पनि आयोजना गरिरहेको छ ।
रुसका परराष्ट्रमन्त्री सर्गे लाभरोभले भारत सहितका मुलुकलाई अफगान परिस्थितिका विषयमा वार्तामा सहभागी गराउने भनेका थिए । त्यसकै आधारमा भारतले यस बैठकमा सहभागी हुने अपेक्षा गरेको थियो तर रुसले बोलाएन ।
रुसले अफगान द्वन्द्वका विषयमा अमेरिकासँग अनेकौं मतभिन्नता राखेको भए पनि दुवै देशले अफगानहरूबीचको वार्ताका लागि जोड दिइरहेको छ । तालिबानले मच्चाइरहेको हिंसा अन्त्यका लागि रुसले प्रयास गरेको हो ।
