२५ जेठ २०८३, सोमबार
स्वास्थ्य तथा जनसंख्या मन्त्रालयले कोरोना भाइरस विरुद्धको खोप लगाउन खोप केन्द्र थप गरेको छ ।
मन्त्रालयका सहप्रवक्ता डा. समिरकुमार अधिकारीले खोप लगाउनेको भीड हुन थालेपछि खोप केन्द्र थप गरिएको बताए ।
उनका अनुसार देशभर नै पहिलेको भन्दा १ हजार ४३३ खोप केन्द्र थप गरिएको छ । पहिले २ हजार ९८९ खोप केन्द्र भएकोमा अहिले त्यो संख्या ४ हजार ४२२ पुर्याइएको छ ।
काठमाडौं उपत्यकामा ८३ खोप केन्द्र थप गरी १४९ पुर्याइएको छ । उपत्यकामा पहिले ६६ खोप केन्द्र थिए ।
सरकारले २०७७ माघ १४ गतेदेखि नेपालमा कोरोना भाइरस विरुद्धको खोप लगाउन शुरू गरेको हो । अहिलेसम्म नेपालमा ४४ लाख ३ हजार २१ जनाले पहिलो मात्रा र २२ लाख ८ हजार ५५ जनाले पूर्ण मात्रामा खोप लगाइसकेका छन् ।
