३० जेठ २०८३, शनिबार
घरमा एक छाक टार्नै धौधौ रहेका राजन्ती धामीको परिवारलाई आर्थिक सहयोग प्राप्त भएको छ ।
घरमा कमाउने पति जयसिंह बेपत्ता भएपछि घरमा चुल्हो बल्ने अवस्था नहुँदा भेट्न पुग्ने व्यक्तिले आर्थिक सहयोग गरेका हुन् ।
शुक्रवारसम्म विभिन्न निकाय र व्यक्तिबाट ४१ हजार आर्थिक सहयोग जुटेको छ । बेपत्ता जयसिंहका भाइ नरेन्द्रसिंहका अनुसार छानबिन समितिका संयोजक एवं गृह मन्त्रालयका सहसचिव जनार्दन गौतमले पीडित परिवारलाई भेटेर १० हजार रुपैयाँ आर्थिक सहयोग गरेका छन् ।
व्यास गाउँपालिकाले २५ हजार, नेत्रविक्रम चन्द नेतृत्वको नेकपाका जिल्ला सचिव भरत मल्लले ५ हजार तथा सशस्त्र प्रहरीका नरेन्द्र बडालले १ हजार रुपैयाँ आर्थिक सहयोग गरेका छन् ।
बेपत्ता जयसिंहका १ छोरा, १ छोरी र पत्नी छन् । ‘छोराछोरी सानै छन्, विदेश जाँदा लागेको ऋण तिर्नुपर्ने एकातिर छ, अर्कोतिर बुवाको जमिनले १ महिना पनि खान पुग्दैन,’ हरकसिंहले भने ।
वैदेशिक रोजगारी खोज्न काठमाडौं जाने क्रममा जयसिंह तुइन तर्दा बेपत्ता भएका हुन् ।
