पार्टी महाधिवेशन अन्योलमा परेपछि कसरी अगाडि बढ्ने भन्ने विषयमा नेपाली कांग्रेसका वरिष्ठ नेता रामचन्द्र पौडेल पक्षधर केन्द्रीय सदस्यहरूको बैठक बस्दैछ । 

महामन्त्री शशांक कोइरालाको निवासमा दिउँसो ३ बजे बैठक बस्न लागेको हो । 

भदौ १६ देखि तय भएको अधिवेशन अनिश्चित भएपछि कसरी अगाडि बढ्ने भन्ने विषयमा छलफल गर्न बैठक बस्न लागेको एक नेताले लोकान्तरलाई जानकारी दिए । उनका अनुसार भोलि साउन २६ गतेका लागि बोलाइएको केन्द्रीय समिति बैठक पनि स्थगित हुने सम्भावना छ । 

पटक–पटक सर्दै आएको महाधिवेशन टार्न खोजिएको भन्दै रामचन्द्र पौडेल पार्टी सभापति एवं प्रधानमन्त्री शेरबहादुर देउवासँग आक्रोशित बनेका छन् । 

‘पार्टी विधानले चार वर्षको कार्यकाल तोकिएको छ । असाधारण परिस्थिति भनेर एक वर्ष थपियो । देशको संविधानलाई समातेर ६ महिना बढाइयो । आज आएर त्यसभित्र पनि महाधिवेशन नगरेर नेपाली कांग्रेसलाई निर्वाचन आयोगसँग भीख माग्ने निरीह अवस्थामा पुर्‍याइएको छ,’ पौडेलले सोमवार बिहान सामाजिक सञ्जाल फेसबुकमा लेखेका छन्, ‘यहाँभन्दा वर्तमान नेतृत्वको चरम असफलता र लापरवाही अरू के हुन्छ ? यो देशकै विडम्बना हो । सर्वत्र असफल व्यक्तिहरू बारम्बार सत्ता समाल्न पुग्छन ।’