काठमाडौं २९ जेठ– व्यबस्थापिका संसद्को विकास समितिले हरेक स्थानीय तहमा एउटा बैंकको स्थापना गर्न सरकारलाई निर्देशन दिएको छ ।

संसद् सचिवाल सिंहदरवारमा सोमवार बसेको समिति बैठकले दुइ महिना भित्रमा सबै स्थानीय निकायमा बैंक खोल्न अर्थ मन्त्रालय र नेपाल राष्ट्र बैंकलाई निर्देशन दिइएको समिति सभापति रवीन्द्र अधिकारीले जानकारी दिए ।

‘स्थानीय तहको कामकारवाहीलाई थप प्रभावकारी बनाउन तथा स्थानीय तहको आर्थिक क्रियाकलापलाई व्यवस्थित गर्न हरेक स्थानीय तहमा कम्तिमा एउटा बैंकको स्थापना हुनु जरुरी देखिएकाले आगामी २ महिनाभित्र सो कार्य गर्न गराउन समिति नेपाल सरकार, अर्थ मन्त्रालय र नेपाल राष्ट्र वैंकलाई निर्देश गर्दछ’ समितिको निर्देशनमा भनिएको छ । सभापति अधिकारीले ७ सय ४४ स्थानीय तहमध्ये झण्डै ४ सय तहमा कुनै पनि बैंक छैनन् । सरकारले आगामी बर्षमा सबै गाउँपालिकामा राष्ट्रिय बाणिज्य बैंकको शाखा खोल्ने नीति बजेट मार्फत सार्वजनिक गरेको छ ।